Հայաստանում «Pepsi» կարտադրվի

Կառավարության նոյեմբերի 11-ի նիստում քննարկվելու է «Ներդրումային ծրագրի շրջանակներում «Ջերմուկ ինթերնեյշնլ» ՍՊԸ-ի կողմից 300 միլիոն դրամը գերազանցող ապրանքների ներմուծման դեպքում մաքսային մարմինների կողմից հաշվարկված ավելացված արժեքի հարկի գումարների վճարման ժամկետը մինչև երեք տարի ժամկետով հետաձգելու մասին» որոշման նախագիծը: Նախագծի հիմնավորման մեջ նշվում է, որ «Ջերմուկ ինթերնեյշնլ» ՍՊԸ-ն զբաղվել է Վրաստանում «Իբերիա Գրուպ» ընկերության կողմից «ՊեպսիԿո» ապրանքանիշով արտադրվող ` «Pepsi Cola», «Mirinda», «7UP», «Mountain Dew» և «Aquafina» ըմպելիքների ներմուծմամբ: 2010թ. «Ջերմուկ ինթերնեյշնլ» ՍՊԸ-ն համաձայնության է եկել «ՊեպսիԿո» ընկերության հետ` Հայաստանում նշված ապրանքների ապակյա ու PET փաթեթավորմամբ արտադրելու և իրացնելու վերաբերյալ: Ներդրումային ծրագրի շրջանակներում ընկերությունը նախատեսում է ք. Երևանում (մոտ 25000 մ2 տարածքում) հիմնել զովացուցիչ ըմպելիքների և բնական հյութերի արտադրության ժամանակակից գործարան: Ծրագրի շրջանակներում նախատեսվում է ներդրումներ իրականացնել մոտ 5 մլրդ ՀՀ դրամի չափով, որից մոտ 2.82 մլրդ ՀՀ դրամ ուղղվելու է ընկերության համար համապատասխան սարքավորումների ձեռքբերմանը: Ընկերության կողմից իրականացվող ծրագրի շրջանականերում կստեղծվեն առնվազն 120 նոր աշխատատեղ, որոնք ապահովված կլինեն 120 հազար ՀՀ դրամ միջին աշխատավարձով: