«Գահերի խաղի» շնորհիվ Իսպանիայում քաղաք է փրկվել՝ հայտնում է Business Insider-ը՝ նշելով, որ հայտնի սերիալն օգնել է Օսունա քաղաքում կանխել տնտեսական աղետը։ Այժմ Օսունան հազարավոր զբոսաշրջիկների է գրավում։
Քաղաքը զգալիորեն տուժել էր գլոբալ տնտեսական ճգնաժամից, որը սկսվել էր 2008 թվականին։ 18 հազար բնակչություն ունեցող քաղաքն առանձնացել է Իսպանիայում գործազրկության ամենաբարձր մակարդակով՝ մինչև 35 տոկոս, ինչը ստիպել է գրեթե բոլոր երիտասարդներին լքել իրենց հայրենի քաղաքը։ Սակայն իրավիճակը կտրուկ փոխվել է 2014-ի աշնանը, երբ դարավոր ճարտարապետությամբ հռոմեական ամրությունը հավանության էր արժանացել հայտնի սերիալի նկարահանումների համար։ Այդ ժամանակվանից ի վեր քաղաքն աշխուժացել է։
Տեղի բնակիչները հարմարվել են նոր իրողություններին։ Ռեստորաններում այժմ առաջարկվում է թեմատիկ կերակուր, իսկ քաղաքային թանգարանը համալրվել է սերիալից որոշ արտեֆակտներով։