Ավիահարվածը Սիրիայի հյուսիսում փախստականների ճամբարի ուղղությամբ կարող է որակվել որպես ռազմական հանցագործություն: TASS-ի հաղորդմամբ՝ այս մասին հայտարարել է Ֆրանսիայի ԱԳՆ պաշտոնական ներկայացուցիչ Ռոմեն Նադալը:
Նա նշել է, որ Ֆրանսիան «ամենավճռական ձևով» դատապարտում է այդ հարվածը: «Այդ նոր հարձակումը, որը դիտավորյալ ուղղված է եղել քաղաքացիական անձանց համար ճամբարի դեմ, հանգեցրել է 3 տասնյակ մարդու մահվան, որոնց թվում եղել են կանայք և երեխաներ»,- նշել է Նադալը:
Նրա խոսքով՝ այդ գործողություններում, «հնարավոր է տեսնել ռազմական և մարդկության դեմ հանցագործության կազմ՝ համաձայն Միջազգային քրեական դատարանի Հռոմեական կանոնադրության»: «Դրա համար պատասպանատուները պետք է պատասխան տան դատարանի առաջ, Ֆրանսիան անկողմնակալ և անկախ հետաքննություն անցկացնելու կոչ է անում՝ այդ նողկալի ակտի հանգամանքների վրա լույս սփռելու համար»,- նշել է դիվանագետը:
Ավելի վաղ «Ալ-Արաբիա» հեռուստաալիքը հայտնել է, որ Էլ-Քամունա ճամբարի վրա սիրիական ռազմաօդային ուժերի հարձակման հետևանքով զոհվել է 28 մարդ, ավելի քան 40 հոգի վնասվածքներ են ստացել: Իր հերթին, Սիրիայի զինված ուժերի հրամանատարությունը հերքել է Իդլիբ նահանգի Սարմադա քաղաքի մոտ փախստականների ճամբարի ուղղությամբ սիրիական ռազմաօդային ուժերի կողմից հարվածելը: