Թուրքական Cumhuriyet թերթի փոխանցմամբ՝ Թուրքիայի վարչապետ Ահմեթ Դավութօղլուի երեկվա հայտարարությունից հետո իշխող «Արդարություն ու զարգացում» կուսակցությունը (ԱԶԿ) այս ամսվա ընթացքում ընտրելու է իր նոր նախագահին ու երկրի վարչապետին:
Դրա հետ կապված՝ Reuters լրատվական գործակալությունը հայտնել է, որ Թուրքիայի նախագահ Ռեջեփ Էրդողանը նպատակադրվել է այս տարվա հոկտեմբերին Թուրքիայում անցկացնել խորհրդարանական նոր ընտրություններ:
Դա արվելու է կառավարման նախագահական համակարգին անցում կատարելն ապահովելու համար: Էրդողանը մտադիր է հասնել նրան, որ խորհրդարանական նոր ընտրություններում ընդդիմադիր «Ազգայնական շարժում» կուսակցությունը (ԱՇԿ) և քրդամետ «Ժողովուրդների դեմոկրատական» կուսակցությունը (ԺԴԿ) չկարողանան հաղթահարել 10 տոկոսանոց ընտրաշեմն ու ներկայացված լինել երկրի խորհրդարանում:
Դա ԱԶԿ-ին կապահովի խորհրդարանում անհրաժեշտ 367 պատգամավոր ունենալով՝ կառավարման նախագահական համակարգին անցում կատարելը հաստատելու համար:
Հաշվի է առնվում այն հանգամանքը, որ ԱՇԿ-ն, ուր պատրաստվում են ընտրել կուսակցության նոր առաջնորդ, այժմ պառակտված է, կուսակցությունում խառը ժամանակներ են:
Բացի դրանից՝ նկատի է առնվում, որ Թուրքիայի հարավ-արևելքում գտնվող քրդաբնակ շրջաններում իրականացվող ռազմական գործողությունները կոչված են նվազեցնելու ԺԴԿ-ի աջակիցների թիվը:
Հիշեցնենք, որ ԱՇԿ-ն 2015 թվականի նոյեմբերի 1-ին Թուրքիայում անցկացված կրկնական ընտրությունների ժամանակ հավաքել է քվեների 11.90 տոկոսը և խորհրդարանում ստացել է 40 մանդատ, իսկ ԺԴԿ-ն հավաքել է քվեների 10.76 տոկոսը և խորհրդարանում ստացել է 59 մանդատ: