Մայիսի 6-8-ը Թուրքիայի Ստամբուլ քաղաքում ընթանալու է ըմբիշների օլիմպիական վարկանիշային եզրափակիչ՝ 2nd OG World Qualifying Tournament մրցաշարը, որտեղ յուրաքանչյուր քաշային կարգում օլիմպիական ուղեգրեր բաժին կհասնեն միայն եզրափակիչ մտած ըմբիշներին: Օլիմպիական չեմպիոն Լևոն Ջուլֆալակյանի գլխավորած հունահռոմեկան ոճի ըմբշամարտի ՀՀ հավաքականից անդամերը օլիմպիական 6 քաշային կարգերից 4-ում արդեն նվաճել են օլիմպիական խաղերին մասնակցելու իրավունքը:
Օգոստոսի 5-21-ը Ռիո Դե ժանեյրոյի (Բրազիլիա) ամառային օլիմպիական 31-րդ խաղերում հանդես գալու պատվին հունահռոմեական ոճի մեր ըմբիշներից արդեն արժանացել են 2012 թ օլիմպիական խաղերի փոխչեմպիոն, 2014 թ աշխարհի չեմպիոն, 2009 թ Եվրոպայի չեմպիոն Արսեն Ջուլֆալակյանը (75 կգ), 2012 թ օլիմպիական խաղերի բրոնզե մեդալակիր, աշխարհի կրկնակի, Եվրոպայի եռակի չեմպիոն Արթուր Ալեքսանյանը (98 կգ), 2015 թ Եվրոպայի մարզական 1-ին խաղերի փոխչեմպիոն Միհրան Հարությունյանը (66 կգ), Մոնղոլիայի վարկանիշային մրցաշարում իրեն գերազանց դրսևորած Մաքսիմ Մանուկյանը (85 կգ):
Այս ոճում ՀՀ պատվիրակները առայժմ օլիմպիական ուղեգիր չեն նվաճել միայն 59 կգ և գերծանր՝ 130 կգ քաշային կարգերում: Ստամբուլում այսօր հունսհռոմեկան ոճի ըմբշամարտի մրցման 145 մասնակիցները 6 քաշային կարգերում կվիճարկեն 12 օլիմպիական ուղեգիր: Հունահռոմեական ոճի մեր ըմբիշներից մարզչական խորհրդի որոշմամբ ստուգատեսին մասնակցում է միայն բազմափորձ ու տիտղոսակիր Ռոման Ամոյանն (59 կգ), ով Ստամբուլում ելույթ կունենա մարզիչներ Սամվել Գևորգյանի և Էդուարդ Սահակյանի ղեկավարությամբ: Երեկ՝ մայիսի 5-ին, կայացան հունահռոմեական ոճի ըմբշամարտի վեց՝ 59, 66, 75, 85, 98 և 130 կգ քաշային կարգերի մասնակիցների կշռման արարողությունն ու վիճակահանությունը: Դրանց արդյունքներով մասնակիցները իմացան իրենց առաջին մրցակիցներին:
Բազմափորձ, 32-ամյա Ռոման Ամոյանին 1/16-րդ փուլում բավական բարդ ու դժվարին մրցակից է բաժին հանել: Նա մրցելու է 2012 թ օլիմպիական խաղերի մասնակից, 60 կգ քաշային կարգի մեծահասակների 2007 թ Եվրոպայի չեմպիոն, 2007-2008 թթ երիտասարդների աշխարհի չեմպիոն, տանտերերի ներկայացուցիչ Ռահման Բիլիչիի հետ: Այս զույգի հաղթողը 1/8-րդ փուլում հանդիպելու է Յանի Հապամաեկի, Ֆինլանդիա-Դիեգո Ռոմանելի, Բրազիլիա զույգի հաղթողի հետ: 59 կգ քաշային կարգի 24 մասնակիցների թվում են նաև Ալբերտ Բաղումյանը (Իսպանիա), Ֆրունզե Հարությունյանը (Շվեդիա):
Իսկ ընդհանուր առմամբ այսօր պայքարի մեջ կմտնեն 7 երկիր ներկայացնող 10 հայ ըմբիշներ: Առավոտյան մրցահերթում Թուրքիայի ժամանակով ժամը 10-15-ը տեղի կունենան հունահռոմեկան ոճի ըմբշամարտի բոլոր 6 քաշային կարգերի որակավորման և սփոփիչ փուլերի գոտեմարտերը, իսկ ժամը 18-20-ը կանցկացվեն 6 քաշային կարգերի եզրափակիչները:
