Հայտնի է Չեմպիոնների լիգայի գավաթի ընթացիկ խաղարկության եզրափակչի առաջին մասնակիցը:
Մադրիդում 1:0 հաշվով պարտվելուց հետո Մյունխենի «Բավարիա»-ն «Ատլետիկո»-ի հետ ուժերը չափեց սեփական հարկի տակ: Դաշտի տերերը հսկայական ճնշում էին գործադրում մրցակցի դարպասին: 31-րդ րոպեին Խաբի Ալոնսոն տուգանային հարվածով գրավեց Յան Օբլակի պաշտպանած դարպասը: Իսպանացուն օգնության հասավ անդրադարձը:
3 րոպե անց Տոմաս Մյուլլերը չիրացրեց 11մ հարվածը: Օբլակը կրկնակի ֆանտաստիկ սեյվի հեղինակ դարձավ: 54-րդ րոպեին Անտուան Գրիզմանը խփեց պատասխան գնդակը: «Բավարիա»-ին 2 գոլ էր հարկավոր եզրափակիչ դուրս գալու համար:
74-րդ րոպեին Արտուրո Վիդալի փոխանցումից հետո «Ատլետիկո»-ի դարպասը գրավեց Ռոբերտ Լևանդովսկին: 10 րոպե անց 11մ չիրացնելու հերթը Ֆերնանդո Տորեսինն էր: Թուրք մրցավար Չունեյթ Չաքիրը կոպիտ սխալ էր գործել: Խավի Մարտինեսի սահանկումը տուգանային հրապարակի սահմաններից դուրս էր: Այդուհանդերձ, Մանուել Նոյերը պահպահեց ինտրիգը:
«Բավարիա»-ին ավելին անել չհաջողվեց: «Ատլետիկո»-ն վերջին 3 տարում երկրորդ անգամ դուրս է գալիս Չեմպոնների լիգայի եզրափակիչ:
«Բավարիա» – «Ատլետիկո»՝ 2:1
1:0 Ալոնսո (31′), 1:1 Գրիզման (54′), 2:1 Լևանդովսկի (74′)