Մի քանի օր է «Ֆեյսբուք»-ում խումբ է ստեղծվել, պահանջում են Հ. Նաղդալյանի հրաժարականը՝ հաշվի առնելով ԱԺ-ում լրագրողների հետ նրա վերջին ճեպազրույցը: Զրույցը հայտնվել է նաև ադբեջանական մամուլի թիրախում:
«Ժառանգություն» կուսակցության պատգամավոր Զարուհի Փոստանջյանի կարծիքով՝ Հերմինե Նաղդալյանը, լինելով բարձրաստիճան պաշտոնյա և ՀՀԿ ներկայացուցիչ, պատահական չէ, որ նման հայտարարություն է արել. «Դա դիտավորյալ արված հայտարարություն է, և պատվիրատուն Սերժ Սարգսյանն է, որովհետև նա ինքն էլ բազմիցս այդ մասին հայտնել է. «Մենք դիտավորյալ չենք բնակեցնում այդ տարածքները, որպեսզի հանձնենք», «Ինչ է, Աղդամը մեր հայրենի՞քն է», նա պատրաստ է եղել 2011թ. ստորագրել Մադրիդյան, Կազանյան փաստաթղթերը:
Ուրիշ հարց է, թե ինչ նպատակ է ունեցել այս հանձնարարությունը՝ ստուգել հանրային կարծի՞քը, թե՞ իրոք սա արդեն այն օրակարգն է, որից այն կողմ Ս. Սարգսյանը չի կարող անցնել»:
Զ Փոստանջյանի խոքով՝ պետք է փոխել ոչ միայն ԵԽԽՎ պատվիրակության կազմը, այլ վերից վար ամբողջ իշխանությունը:
Հիշեցնենք՝ Հ. Նաղդալյանը լրագրողների հետ ճեպազրույցում մասնավորապես նշել էր. «Մենք ասում ենք, որ մենք գնում ենք փոխզիջման. մեր փոխզիջումը ոչ թե 5 գրավյալ տարածքներն են, այլ Մադրիդյան սկզբունքների ամբողջական համալիրը, որտեղ մենք ներկայանում ենք որպես մեր խաղաղ, ինքնիշխան պետության համար պայքարող ժողովուրդ, մենք չենք պայքարում ձեր հողերի համար, մենք պայքարում ենք մեր խաղաղ, ինքնիշխան պետության համար: Դրա համար մենք ընդունում ենք, որ երբ որ կընդունվի, կլինի հանրաքվեն և կընդունվի կարգավիճակի մասին որոշում, և աշխարհը կընդունի Ղարաբաղի անկախությունը, մենք ձեր հողերը կամ այն հողերը, որոնց վրա մենք այսօր այդ իրավունքը չունենք, մենք այդ հողերը չենք ուզում: Սա մեր «բուֆերնի զոնան» է և սա մեր անվտանգության երաշխիքն է»:
Մանրամասները տեսանյութում: