Ռուսական ռազմական օդաչուները միջադեպեր չեն հրահրում, այլ միայն ամերիկյան զինվորականներին «ազդանշան են ուղարկում» իրենց ներկայության մասին, համարում է ԱՄՆ ռազմածովային ուժերի շտաբի պետ, ծովակալ Ջոն Ռիչարդսոնը, հայտնում է RIA Novosti-ն:
«Ես չեմ կարծում, որ ռուսները ջանում է միջադեպ հրահրել: Ես մտածում եմ, որ նրանք ջանում են ազդանշան տալ: Կարծում եմ, որ լիովին հասկանալի է հետևյալը. նրանք ուզում են մեզ տեղեկացնել, որ մեզ տեսնում են այնտեղ, Բալթիկ ծովում»,- հայտարարել է Ռիչարդսոնը:
Ընդ որում, նա նմանատիպ գործողությունների դադարեցման հույս է հայտնել: Նրա խոսքերով` ռուսական ինքնաթիռների մանևրների արդյունքում կարող է տեղի ունենալ «մարտավարական սխալ»: Այդ պատճառով, ԱՄՆ-ն ձգտում է զինվորականների հանգիստ փոխհարաբերության: «Մենք ցանկանում ենք որոշակի նորմալացում»,- ասել է ծովակալը: