ԵԽԽՎ հայաստանյան պատվիրակության նախկին ղեկավար, ՀՀՇ վարչության անդամ Հովհաննես Իգիթյանը «Առաջին լրատվական»-ի հետ զրույցում Լևոն Տեր-Պետրոսյանի հանդիպումները ՀՀ նախագահ Սերժ Սարգսյանի և ԼՂՀ նախագահ Բակո Սահակյանի հետ որակեց որպես ներքաղաքական նշանակության. «Ինչպես նաև ժողովրդին ցույց տալու, թե այդ վտանգավոր հարցում իշխանությունն ու ընդդիմությունը միասին են»:
Նրա խոսքով՝ 1997 թվականին էլ Լևոն Տեր-Պետրոսյանի տարբերակին համաձայն չէր Լեռնային Ղարաբաղը, և Լևոն Տեր-Պետրոսյանը հրաժարական տվեց, քանի որ որ իր թիմին ևս նա չկարողացավ համոզել: «Այդ փուլային կարգավորմանը դեմ էր նաև Սերժ Սարգսյանը»,- 1997 թվականի տարեվերջի Անվտանգության խորհրդի նիստը հիշելով՝ ասաց Հովհաննես Իգիթյանը:
Ինչպես նշեց մեր զրուցակիցը՝ այժմ Ադրբեջանը ցույց տվեց, որ ինքը այլ նպատակներով օգտագործեց այս ամբողջ ժամանակահատվածը. «Եվ այսօր միակ զսպող ուժը Լեռնային Ղարաբաղի բանակն է՝ Հայաստանի աջակցությամբ: Իսկ Հայաստանը այս ամբողջ ընթացքում իր անվտանգությունը կապեց մի ինստիտուտի հետ, որը կոչվում է ՀԱՊԿ, Հայ-ռուսական ռազմական անվտանգություն, ԵՏՄ և ի վերջո՝ Ռուսաստան-Ղազախստան-Բելառուս: Եվ հիմա այս ինստիտուտը չի աշխատում՝ ոչ թե որ դիվանագետներն են վատը, այլ համակարգն էր սխալ ընտրված»:
Գնահատելով այսօրվա մեր իշխանությունների կարողությունը՝ ձերբազատվելու Ռուսաստանի դոմինանտ դերակատարությունից և այլընտրանք փնտրելու, Հովհաննես Իգիթյանը կարծում է, որ «մեր իշխանություններն այնքան դեգրադացված են», որ հազիվ թե այդ հնարավորությունը ունենան. «Իսկ Ռուսաստանը ոչ միայն զենք է վաճառում Ադրբեջանին, այլև անցկացնում է այդ զենքի կիրառման ուսուցում: Ես չեմ բացառում, որ վաղը ռուսները նաև կփորձեն այդ զենքը կիրառել Ադրբեջանի հետ միասին: Որովհետև Ռուսաստանը պետք է աշխարհին ցույց տա, որ իր զենքը շատ ուժեղ է, սակայն առայժմ Ադրբեջանը չի կարողանում ցույց տալ այդ զենքի ուժը»:
