Լեռնային Ղարաբաղի խորհրդարանի պատգամավորները կտրականապես դեմ են Ղարաբաղյան հակամարտությունը զիջումային և մասնավորապես տարածքների վերադարձման սկզբունքով կարգավորմանը։
«Առաջին լրատվական»-ի հետ զրույցում վարչապետ Արայիկ Հարությունյանի ղեկավարած քաղաքական թիմի՝ «Ազատ հայրենիք» կուսակցության պատգամավոր, Ազգային ժողովի արտաքին հարաբերությունների մշտական հանձնաժողովի նախագահ Արզիկ Մխիթարյանն ընդգծեց՝ ողջ Ղարաբաղի չմասնակցությունը բանակցություններին առհասարակ անհնարին է դարձնում հարցի կարգավորումը:
Ազգային ժողովի «Դաշնակցություն» խմբակցության քարտուղար Ռիտա Մնացականյանն էլ հավելեց՝ փոխզիջումը պետք է կատարվի վստահության մթնոլորտում, այսօր այդ մթնոլորտը չկա, իսկ փոխզիջում ասելով՝ պատգամավորը նկատի չունի տարածքների վերադարձ, ինչի մասին այս օրերին բարձրաձայնում է Հայաստանի Ազգային ժողովի փոխխոսնակ Հերմինե Նաղդալյանը։
Հերմինե Նաղդալյանի սկանդալային հայտարարությանն անդրադարձավ նաև Արզիկ Մխիթարյանը՝ այն որակելով պարզապես մանկամտություն։
Այսօր վաղ առավոտյան Լեռնային Ղարաբաղ է ճանապարհվել Հայաստանի Հանրապետության առաջին նախագահ Լևոն Տեր-Պետրոսյանը։ Արցախի խորհրդարանի պատգամավորները այդ այցելությունը որակում են պարզապես որպես բարի կամքի դրսևորում։