Մեզ տեղեկություն է հասել, որ Արմավիրի մարզի բոլոր գյուղապետերը մեկնել են սահման, ինչը որոշ դժվարություններ է ստեղծել մարզում գյուղատնտեսական աշխատանքների հետ կապված: Ինչպես հայտնի է՝ այժմ գյուղատնտեսական վարուցանքի ակտիվ սեզոնն է, իսկ գյուղացիների մեծ մասը վարկով են սկսում գյուղատնտեսական տարին:Այդ ընթացում Արմավիրի մարզպետ Աշոտ Ղահրամանյանը զբաղված է եղել ապրիլի սկզբին ՌԴ Վոլոգդայի նահանգից ժամանած պատվիրակությանն ընդունելով, որը գլխավորում է մարզի առևտրատնտեսական զարգացման վարչության պետ Դիմիտրի Անտոնովը:
Այս առթիվ մի քանի հարց ուղղեցինք Արմավիրի մարզպետ Աշոտ Ղահրամանյանին:
– Պարոն Ղահրամանյան, ճի՞շտ է, որ Մանվել Գրիգորյանը Արմավիրի գյուղապետերին հավաքել, տարել է սահման:
– Մանվել Գրիգորյանը չի տարել սահման, մեր գյուղապետերն իրենց ցանկությամբ գնացել են սահման:
– Բոլո՞րն են գնացել:
– Մոտ 30-ից ավելի:
– Գյուղապետերի բացակայությունը գյուղատնտեսական աշխատանքների հետ կապված խոչընդոտ չէ՞: Հայտնի է նաև, որ շատերը վարկերի տակ են:
– Բնական է, որ եթե մարդիկ վարկ են վերցրել, պետք է վարկերը մուծեն կամ հատուցեն: Վարկ վերցնելը լավ է, տալը՝ վա՞տ: համոզված եմ, որ մեկը մյուսի հետ կապ չունի, իսկ եթե անհրաժեշտություն լինի, համապատասխան քննարկումներ կլինի համապատասխան վարկառուի և տվյալ բանկի միջև: Եթե իրենք ցանկություն են հայտնել գնալու, մենք պիտի արգելե՞նք իրենց: Մարդու կամավոր կամքն ա, ինչ կարող ենք անել:
– Որքա՞ն ժամանակ է՝ գյուղապետերը դիրքերում են:
– Նայած, կա, որ 10 օր է՝ գնացել են, կար, որ 7 օր է:
– Համոզվա՞ծ եք, որ մարզում գյուղատնտեսական աշխատանքների հետ կապված խնդիրներ չկան նրանց բացակայության պատճառով:
– Աշխատուժի պակաս կա, բայց էդպիսի խնդիր չենք տեսնում: Կարող է ընտանիքի անդամներն են անում, կամ հարազատներն են օգնում: Հո գյուղատնտեսական աշխատանքները չեն սպասում՝ մարդիկ գնան-գան: Մարդիկ բոլորն էլ էսօր աշխատում են օր ու գիշեր:
– Փաստորեն գյուղապետերն էդտեղ էական անելիք չունեն, Ձեր խոսքերից էդպես կարելի է ենթադրել:
– Գյուղապետը եթե գնում է, իր տեղակալը տեղում է:
– Պարոն Ղահրամանյան, իսկ կարելի՞ է իմանալ՝ Դուք ինչո՞ւ չեք մեկնել սահման:
– Ես ցանկություն հայտնել եմ արդեն մեկնելու:
– Բայց Ձեզ չեն տանում, փաստորեն:
– Ոչ թե չեն տանում, եթե անհրաժեշտ լինի, կգնամ: Ես երեկ կգնայի, եթե թույլատրեին: Ես համոզված եմ, որ յուրաքանչյուր հայ մարդ է պատրաստ գնալու սահման:
– Փաստորեն, կոնկրետ Ձեզ չեն թույլատրում:
– Դեռ դրա անհրաժեշտությունը չկա: