Եգիպտոսի ոստիկանությունը մայիսի 1-ին ձերբակալել է երկու ընդդիմադիր լրագրողների՝ Ամր Բադրին և Մահմուդ Սաքքային: Ձերբակալությունը տեղի է ունեցել Կահիրեում Լրագրողների միության շենքում, որտեղ Բադրը և Սաքքան նստացույց են կազմակերպել՝ հայտնում է Agence France-Presse-ը:
Բադրը ընդդիմադիր Yanair.net կայքի գլխավոր խմբագիրն է, Սաքքան՝ խմբագրության աշխատակից: Ապրիլի 29-ին հաղորդվում էր, որ ոստիկանությունը խուզարկություններ է կատարել լրագրողների բնակարաններում, որից հետո նրանք որոշել են գործադուլ անել: Գործակալության տեղեկությամբ՝ լրագրողները մեղադրվում են բողոքի անօրինական ակցիաների կոչեր անելու համար:
Ապրիլի սկզբին Սաուդյան Արաբիայի թագավորն ու Եգիպտոսի նախագահը ստորագրել են ջրային սահմանների սահմանազատման մասին համաձայնագիր, որի համաձայն՝ Կարմիր ծովում երկու կղզիներ Եգիպտոսից փոխանցվել են Էր-Ռիադին: Փաստաթուղթը պետք է վավերացնի Եգիպտոսի խորհրդարանը:
Մահմուդ Սաքքան իր ֆեյսբուքյան էջում կոչ է արել միանալ Սաուդյան Արաբիային երկու կղզի հանձնելու դեմ բողոքներին՝ գրում է AFP-ն:
Ապրիլի լույս 22-ի գիշերը Եգիպտոսում իրականացվել է ընդդիմադիր ակտիվիստների ձերբակալության առաջին ալիքը, ձերբակալվել են շատ ընդդիմադիրներ Ալեքսանդրիայում, Ասուանում և երկրի այլ քաղաքներում: Առանձին վայրերում բռնկված ինքնաբուխ բողոքի ակցիաներն արագորեն ճնշվել են: