Ինչո՞վ բացատրել Հայաստանի և Ադրբեջանի հակամարտությունը: Ի՞նչ տեղ է գրավում այդ հակամարտության մեջ էներգետիկան: Պատճառներից մեկը կարող է լինել այն, որ աստիճանաբար մեկուսացման մեջ հայտնվող Ռուսաստանը ագրեսիվ պահվածք է դրսևորում: Օրինակ՝ քանի դեռ ՄԱԿ-ը գնահատական չի տվել Ղրիմի կարգավիճակին, Ռուսաստանի համար հեշտ չի լինի գազ վաճառել Եվրոպային:
Այն ժամանակ, երբ Ռուսաստանը պայքարում է «Հյուսիսային հոսք-2»-ով Եվրոպա գազ հասցնելու համար, ԵՄ երկրները դեռ բանակցություններ են վարում այդ հարցով, մյուս կողմից էլ՝ նրանք փնտրում են նաև այլընտրանքային այնպիսի աղբյուրներ, ինչպիսիք են Իսրայելը, Հարավային Կիպրոսը և Ադրբեջանը:
Հարկ է ուշադրություն դարձնել նաև մեկ այլ գործոնի վրա. վերջերս բոլոր շահագրգիռ երկրների մասնակցությամբ, ներառյալ ԱՄՆ-ը, հանդիպում տեղի ունեցավ Հարավային գազային միջանցքով ԵՄ ադրբեջանական գազի մատակարարման հարցով: Նախագիծը հավանության է արժանացել: Կարո՞ղ էր արդյոք այդ փաստը անհանգստացնել Ռուսաստանին:
Միևնույն ժամանակ, Ռուսաստանը չի ուզում, որ խոսք լինի իսրայելական կամ կիպրոսյան գազի մասին: Հայտնի է, որ Հարավային Կիպրոսում ռուսական բանկերը լուրջ ակտիվներ ունեն: Դժվար չէ գուշակել, որ այդ ակտիվների դուրսբերումը դժվարին կացության մեջ կդնի Հարավային Կիպրոսին և Հունաստանին: Այդ կապակցությամբ պետք է ուշադրություն դարձնել, թե ինչպիսին է Ռուսաստանի դիրքորոշումը Կիպրոսի հարցում: Եթե ավելացնելու լինենք նաև «Պանամայի փաստաթղթերը», ապա ցանկացած նշանակալի իրադարձություն հնարավոր կլինի տարբեր կերպ մեկնաբանել:
Մի կողմից Ադրբեջանի համար նավթի գների նման անկման ֆոնին պատերազմը բոլորովին էլ ձեռնտու չէ, սակայն Մինսկի խմբի անդամները՝ ԱՄՆ-ը, Ռուսաստանը և Ֆրանսիան, որոնք ցանկացած պահի կարող են լուծել այդ հարցը, դարձրել են այն միմյանց միջև առևտրի առարկա:
Լուսանկարը` PAN Photo-ի
