Sputnik լրատվական գործակալության փոխանցմամբ՝ Ռուսաստանը 2016 թվականի առաջին եռամսյակի արդյունքներով Վրաստանի հիմնական առևտրային գործընկերների թվում զբաղեցնում է երրորդ տեղը՝ զիջելով Թուրքիային ու Իռլանդիային: Այս մասին են վկայում Վրաստանի վիճակագրության ազգային ծառայության տվյալները:
Այս տարվա հունվար-մարտ ամիսներին Վրաստանի ու Ռուսաստանի միջև ապրանքաշրջանառության ծավալն աճել է ավելի քան 8.3 տոկոսով՝ համեմատած 2015 թվականի առաջին եռամսյակի հետ, և կազմել ավելի քան 185 միլիոն դոլար:
Ռուսաստանին է բաժին ընկել Վրաստանի արտաքին առևտրաշրջանառության 8.6 տոկոսը: Վրաստանից Ռուսաստան արտահանումն այս տարվա հունվար-մարտ ամիսներին աճել է 42 տոկոսով և կազմել ավելի քան 38.5 միլիոն դոլար (վրացական ողջ արտահանման 8.7 տոկոսը):
Ավելի քան 9.9 միլիոն դոլար է կազմել վրացական գինու արտահանումը, ինչը 3.8 միլիոն դոլարով գերազանցում է նախորդ տարվա նույն ժամանակահատվածի ցուցանիշը:
Ռուսաստանից Վրաստան ներկրումն էլ աճել է 2 տոկոսով և կազմել 146.5 միլիոն դոլար՝ Վրաստանի ողջ ներկրման 8.6 տոկոսը: