Հարավային Ամերիկայի կրկեսներում գերությունից փրկված 33 առյուծների վերադարձրել են ՀԱՀ, որտեղ նրանց կտեղավորեն մասնավոր ապաստանում՝ հայտնում է Associated Press-ը:
Գործակալության տվյալներով՝ այդ առյուծներից տասը ազատագրվել են Կոլումբիայում, իսկ մնացածին կենդանիների պաշտպանները փրկել են Պերուում:
«Նրանք ամբողջ կյանքը ապրել են բեռնատարի հետևի մասում գտնվող փոքր վանդակներում: Նրանցից մի քանիսի ատամները Կոլումբիայի և Պերուի կրկեսներում կոտրված էին մետաղե ձողերով: Մի քանիսի ծնոտները հեռացված էին… Նրանց տուն վերադարձնելը հիանալի է»,- մեջբերում է գործակալությունը Animal Defenders International կենդանիների պաշտպանության միջազգային խմբի նախագահ Ջեն Քրիմերի խոսքերը:
Կենդանիներին տարել են ՀԱՀ-ի հյուսիսում գտնվող Emoya ապաստան, որտեղ առյուծների առողջությանը և վարքին կհետևեն մասնագետները, ովքեր նաև կզբաղվեն կենդանիներին կերակրելով, որոնք «գերությունից» ի վեր զրկված էին որս անելու կարողություններից: