ԱՄՆ նախագահ Բարաք Օբաման Սպիտակ տանը ապրիլի 30-ին տեղի ունեցած լրագրողների ամենամյա ընդունելության ժամանակ ծաղրել է Հանրապետական կուսակցությունից նախագահի պաշտոնին հավակնող Դոնալդ Թրամփին: Այս մասին հայտնում է Variety-ն:
Օբաման ասել է, որ իրեն «մի քիչ վշտացրել է» ընդունելությանը Թրամփի բացակայությունը: «Հնարավոր է՝ այս ճաշը Դոնալդի համար չափազանց անհամ է… Հնարավոր է՝ նա հիմա իր տանը ուտում է Թրամփ-սթեյք և Twitter-ում վիրավորանքներ է գրում Անգելա Մերկելի հասցեին»,- հեգնել է Օբաման:
«Նրանք (հանրապետականները) ասում են, որ նրան նախագահ լինելու համար չի բավականացնում փորձը արտաքին քաղաքականության մեջ: Հանուն արդարության պետք է ասել, որ նա տարիներ է անցկացրել՝ հանդիպելով ամբողջ աշխարհի առաջնորդների հետ. Միսս Շվեդիա, Միսս Արգենտինա, Միսս Ադրբեջան և այլն»,- հավելել է նախագահը՝ նկատի ունենալով, որ Թրամփը «Միսս Տիեզերք» գեղեցկության մրցույթի անցկացման իրավունք է ձեռք բերել: