Ադրբեջանական Turan լրատվական գործակալության փոխանցմամբ՝ Եվրոպայի խորհրդի գլխավոր քարտուղար Թորնբյոռն Յագլանդը հայտարարություն է տարածել Ադրբեջանում դատարանի կողմից հանրահայտ քաղաքական գործիչ Իլգար Մամեդովին ազատելու հարցում մերժելու մասին:
«Խորին մտահոգություն են հարուցում Ադրբեջանից ստացված այն նորությունները, որ դատարանը բանտում է թողել Իլգար Մամեդովին` Բաքվում Եվրոպայի խորհրդի Քաղաքական հետազոտությունների դպրոցի ղեկավարին:
Ադրբեջանական դատարանը հերթական անգամ անհարգալից վերաբերմունք ցուցաբերեց ՄԻԵԴ-ի որոշումները կատարելու հարցում իր երկրի ստանձնած պարտավորությունների հանդեպ»,- ասված է հայտարարության մեջ:
Իլգար Մամեդովն արդեն 3 տարի է, ինչ գտնվում է բանտում` չնայած ՄԻԵԴ-ի վճռին, որի համաձայն՝ նրան հետապնդելն ունի քաղաքական դրդապատճառներ և այդ ամենի նպատակը նրան պատժելն է` կառավարությանը քննադատելու համար:
Յագլանդն Ադրբեջանի նախագահ Իլհամ Ալիևին` որպես Սահմանադրության երաշխավորի, կոչ է արել, որ Ադրբեջանը կատարի Մարդու իրավունքների եվրոպական կոնվենցիայի շրջանակներում ստանձնած պարտավորությունները: