ՄԱԱՀԻ փորձագետ Գևորգ Մելիքյանն «Առաջին լրատվական»- ի հետ զրույցում անդրադարձավ քառօրյա պատերազմի ընթացքում միջազգային հանրության արձագանքին և տարբեր երկրներում մեր դեսպանների աշխատանքին:
«Միջազգային հանրության արձագանքը շատ տարբեր էր», – նշեց Գ. Մելիքյանը և անդրադառնալով Վրաստանի և Ուկրաինայի արձագանքին՝ նշեց, որ ԵՏՄ անդամ երկրներ չեն և ունեն տարածքային ամբողջականության խնդիրներ, և Հայաստանը միշտ չէ, որ աջակցել է այդ երկրներին, կան որոշակի անջրպետներ, այնուամենայնիվ, Վրաստանը փորձեց շատ զգուշավոր լինել:
«Մենք Ադրբեջանի ագրեսիան դատապարտող հայտարարությունների ականատես չեղանք»- նշեց փորձագետը՝ հավելելով, որ հարց է, թե ինչպես է Հայաստանն աշխատել միջազգային կառույցների հետ:
«Դիվանագիտական աշխատանքը նման է այսբերգի, որի մեծ մասը գտնվում է ջրի տակ, չի երևում: Քառօրյա պատերազմը շատ կառույցների կսթափեցնի»,- նշեց Գ. Մելիքյանը՝ հավելելով, որ արտգործնախարարությունը պետք է հետևություններ անի: Նրա դիտարկմամբ՝ դեսպանություններում լուրջ խնդիրներ ունենք՝ կենտրոնացած ենք միայն Ցեղասպանության ճանաչման վրա. «Մեր ամբողջ ռեսուրսը ծախսում ենք պատմական այդ իրողությունը քաղաքականացնելու վրա, որը ևս շատ կարևոր է, բայց մենք այսօր ունենք այլ իրողություն՝ կապված մեր անվտանգության հետ»:
Մանրամասները՝ տեսանյութում: