«Հրապարակ» թերթը գրում է. «Սահմանադրական ճգնաժամ է կանխատեսվում, եթե ընդդիմությունը լուրջ գործի, իսկ դիմությունը շարունակի դանթել խորհրդարանի աթոռների վրա, «լող տա» սաունաներում, բիզնեսը տեղափոխի օֆշորներ, հնարավոր է մինչև հունիսի 1-ը Ընտրական օրենսգիրքը չընդունվի, և փակուղային վիճակ ստեղծվի երկրում: Դրա համար էլ իշխանությունը նոն-ստոպ ու էքստեռն հավաքներ է անում Մելիք-Ադամյանում՝ բացատրելով ՀՀԿ-ականներին, որ իրենց «խրամատն» Ազգային ժողովն է, որտեղ պետք է կռվեն ԸՕ-ն ժամանակին անցկացնելու համար:
Շա՞տ եք վախենում, որ չանցնի, դրա համա՞ր են այդ հավաքները, հարցրինք սահմանադրագետ, ԱԺ աշխատակազմի ղեկավար Հրայր Թովմասյանին: ««Կիկոսի մահը» կարդացե՞լ ես»: Չէ, Ջոյսի «Ուլիսեսն» եմ կարդացել: «Դե, հասկանում եք, «Կիկոսի մահը» շատ լավն է, էլի, գնա կարդա` գնացի, ունեցա, վեր ելավ, ցած ընկավ… ընդդիմությանն էլ ասա` կարդան»: Ուզում եք ասել` գիշերները չեք քնի, արտահերթներ կանեք, պահակ կկանգնեք Մելիք-Ադամյանում, որպեսզի «Կիկոսը» հանկարծ այնտեղով չանցնի՞. մի խոսքով` բացառո՛ւմ եք: «Ի՞նչ եմ բացառում»: Կիկոսին, ես ուղիղ 3 ժամ բացատրում էի, որ սահմանադրական ճգնաժամ է սպասվում ձեզ, բոլոր դեպքերում: «Ես էլ Ձեզ բացատրում էի, որ Թումանյանը հանճարեղ գրող է»:
Մանրամասները՝ թերթի այսօրվա համարում