ՀՀ Ազգային ժողովի ՀՀԿ խմբակցության պատգամավոր, ԵԽԽՎ հայաստանյան պատվիրակության անդամ Սամվել Ֆարմանյանը չի կիսում այն կարծիքը, որ, հենվելով ադրբեջանական լրատվամիջոցների տարածած տեղեկատվության վրա, փորձ է արվում ԼՂ հարցը լուծել փուլային տարբերակով:
«Առավելապաշտական ցանկությունների ձախողման և սպասելիքների չիրականացման արդյունքում էր, որ Ադրբեջանը դիմեց նման ռազմական սադրանքի»,- «Առաջին լրատվական»-ի հետ զրույցում ասաց Սամվել Ֆարմանյանը՝ հավելելով, որ ինքը զարմանում է, թեև հասկանում է, թե ինչու է Ադրբեջանը սկսել խոսել ինչ-որ նորացված փաստաթղթի մասին:
Մեր զրուցակիցը տարօրինակ է համարում, որ «լավրովյան փաստաթղթի» մասին խոսում է Ադրբեջանը, ոչ թե Լավրովը:
Անդրադառնալով բանակցությունների շարունակման համար ՀՀԿ կողմից առաջ քաշված 3 հայտնի պայմաններին՝ Սամվել Ֆարմանյանն ասաց. «Ցույց տալ, որ ոչինչ տեղի չի ունեցել, չի կարելի: Եվ խոսքը ոչ թե նախապայմանների մասին է, այլ դրանք շատ տրամաբանական առաջարկություններ են՝ ուղղված օգնելու բանակցային գործընթացի վերսկսմանը, որովհետև պաշտոնական Երևանը մշտապես հայտարարել է, որ այլընտրանք չի տեսնում խաղաղ բանակցված կարգավորման: Եվ սա երկնքից վերցված տեսություն չէ, այլ ռեալ գոյություն ունեցող իրողություն»:
Գնահատելով ԱԺ փոխնախագահ, ԵԽԽՎ հայաստանյան պատվիրակության նախագահ Հերմինե Նաղդալյանի հայտարարությունը՝ 5 շրջանների վերադարձման մասին, Սամվել Ֆարմանյանն ասաց. «Նրանք, ովքեր միջազգային խորհրդարանական հարթակներում աշխատում են և պատասխանատու պարտականություններ ունեն, պետք է առավելագույնս զգույշ լինեն իրենց հայտարարություններում, որովհետև ժամանակակից աշխարհն այնպիսին է, որ ցանկացած խոսք, երբ արդեն դուրս է գալիս բերանից, դառնում է հանրային սեփականություն, որը կարող է ի չարս օգտագործվել: Հակառակ դեպքում մեծ աշխատանք պետք է տանել ասվածի հետևանքները վերացնելու համար»: