Ֆրանսիայի ներքին գործերի նախարար Բեռնար Կազնյովը հայտարարել է, որ Փարիզում և ֆրանսիական այլ քաղաքներում աշխատանքային օրենսդրության բարեփոխումների դեմ ցույցերի ընթացքում 78 ոստիկաններ վնասվածքներ են ստացել, ձերբակալվել է 214 մարդ՝ փոխանցում է France Presse գործակալությունը։ Վնասվածքներ են ստացել նաև ցույցի մասնակիցները։
Արհմիությունների գնահատականներով՝ երկրով մեկ փողոց էին դուրս եկել 500 հազար անձինք։ Բողոք արտահայտելով՝ ցուցարարները կոտրում են ցուցափեղկերը, հրկիզում ավտոմեքենաներ ու հարձակվում ոստիկանների վրա։
Օրինագիծը գործատուներին հնարավորություն է տալիս ավելացնել աշխատաժամերը և պայմանավորվել աշխատողների հետ անմիջապես՝ շրջանցելով արհմիությունները։ Բարեփոխումը նախատեսում է նաև աշխատակիցների հեռացման ընթացակարգի պարզեցում։
