Այսօր ադրբեջանական ԶԼՄ-ները շարունակում են ներկայացնել հայկական կողմի հրետակոծությունների մասին հրապարակումներ։ Ադրբեջանական REPORT.AZ կայքի փոխանցմամբ Նոյեմբերյանի, Շամշադինի ու Իջևանի շրջաններում տեղակայված հայկական զորքերը հարվածել են Թովուզի ու Ղազախի շրջաններում գտնվող ադրբեջանական կողմի դիրքերին:
Հաղորդվել է նաև Թարթառի, Ակնայի, Վարանդայի, Մեխակավանի շրջանների մոտ երկու տասնյակ գյուղերի մոտ գտնվող ադրբեջանական կողմի դիրքերին ու անանուն բարձրունքներին հասցված հարվածների մասին:
Լրատվամիջոցը նաև հայտնել է, որ Ակնայի շրջանում հայկական կողմի հրետակոծությունների ժամանակ վիրավորվածներից երկուսի վիճակը շարունակում է մնալ ծանր։
Azadliq.info կայքը հայտնել է, որ հայերը վերջին երկու օրում Ադրբեջանի երկու շրջանում ավերել են 136 տուն: Աղդամի շրջանի արտակարգ իրավիճակների հարցերով հանձնաժողովի պետի տեղակալ Մանսուր Գուլիևը նշել է, որ Աղդամի շրջանում երկու օրում ավերվել է 76 տուն, ևս 58 տուն ավերվել է Թարթառի շրջանում, գրանցվել են հոսանքազրկումներ ու գազի մատակարարման դադարներ:
Meydan.TV-ն էլ տեսանյութ է ներկայացրել Ակնայի շրջանում հայկական կողմի հարվածների արդյունքների մասին:
Minval.az կայքը հաղորդում է, որ Ադրբեջանի փոխվարչապետ, փախստականների ու հարկադիր վերաբնակների հարցերով պետական հանձնաժողովի նախագահ Ալի Հասանովը հանդիպել է ՄԱԿ-ի՝ փախստականների հարցերով գերագույն հանձնակատարի վարչության Ադրբեջանում ներկայացուցիչ Դագ Սիգուրդսոնի հետ, որի ժամանակ մտահուգություն է հայտնել, առ այն, որ իբր «խեղաթյուրված և սխալ տեղեկատվություն» է ներկայացվել ապրիլի 2-ին Ղարաբաղա-ադրբեջանական զորքերի շփման գծում տեղի ունեցած իրադարձությունների վերաբերյալ:
Ըստ ամենայնի, ադրբեջանական կողմի դժգոհությունը հարուցել է, այն, որ Լեռնային Ղարաբաղը ներկայացված է որպես «տարածաշրջան, որին հավակնում են թե՛ Հայաստանը, թե՛ Ադրբեջանը»:
