Amnesty International միջազզգային իրավապաշտպան կազմակերպությունն արշավ է սկսել ի պաշտպանություն Ադրբեջանում ազատազրկման դատապարտված «Ազատություն» ռադիոկայանի հետաքննող լրագրող Խադիջա Իսմայիլովայի:
Կազմակերպության կողմից այդ մասին տարածված հայտարարության մեջ ասվում է, որ Խադիջա Իսմայիլովան խղճի բանտարկյալ է, նա դատապարտվել է շինծու մեղադրանքներով, ենթարկվել է հետապնդումների և պետք է անհապաղ ազատ արձակվի:
Կազմակերպությունը միջազգային ԶԼՄ-ներին կոչ է արել Բաքվում առաջիկայում տեղի ունենալիք Formula-1 մրցումների լուսաբանումներում դրանք օգտագործել Իսմայիլովայի դատական գործի մասին ճշմարտությունը համաշխարհային հանրությանը հասցնելու համար:
Amnesty International-ն այդ առնչությամբ դիմել է իրավապաշտպան կազմակերպությունների շրջանում իր բոլոր գործընկերներին և բոլոր շահագրգիռ անձանց՝ կոչ անելով էլեկտրոնային նամակներ գրել Ադրբեջանի նախագահ Իլհամ Ալիևին`պահանջելով անհապաղ ազատ արձակել Խադիջա Իսմայիլովային։
Խադիջա Իսմայիլովան Ադրբեջանում ձերբակալվել է անցյալ տարվա դեկտեմբերի 5-ին` նախկին գործընկերոջը ինքնասպանության հասցնելու շինծու մեղադրանքով և հետո «խոշոր չափերի յուրացում և զեղծարարության», «ապօրինի ձեռնարկատիրության», «հարկերի վճարումից խուսափելու», «պաշտոնեական լիազորությունները չարաշահելու» կեղծ մեղադրանքներով դատապարտվել 7,5 տարվա ազատազրկության: