ՀՀԿ ԳՄ երեկվա նիստից հետո Էդուարդ Շարմազանովը հայատարել էր, որ Հայաստանը բանակցային գործընթացին կվերադառնա, եթե ապահովվի երեք պայմանների կատարում՝ վստահության մեխանիզմի ներդրում, հասցեական հայտարարություններ և երաշխիքները, որ Ադրբեջանը դարձյալ չի գնա ագրեսիայի:
ԱԺ ՀՀԿ խմբակցության ղեկավար Վահրամ Բաղդասարյանն այսօր խորհրդարանում լրագրողների հետ զրույցում անդրադարձավ Ղարաբաղյան հիմնախնդրի մասով Հայաստանի առաջ քաշած երեք պայմաններին՝ հաստատելով, որ Հայաստանի քաղաքականության մեջ փոփոխություն է տեղի ունեցել: «Մենք ասում ենք հետևյալը՝ հարգեք ձեր ստորագրությունը, որը դրվել է 1994 թվականի պայմանագրի տակ: Այդ հրադադարը պետք է լինի կայուն, և կոչ ենք արել Մինսկի խմբի երկրներին ու նաև Ադրբեջանին, որ մեզ երաշխիքներ են պետք, որ դա ժամանակավոր չէ: Նաև հետաքննության հետ կապված է մեր առաջարկը, վերջիվերջո պետք է վերջնական ու օբյեկտիվ պատասխան տրվի միջազգային կառույցների կողմից՝ ովքեր են սադրիչները, ովքեր են ահաբեկիչները:
Մեր բարձրացրած երեք կետերից ոչ մեկն անհավանական չեն, ինչպես բռնապետ Ալիևն էր 10 անհավանական առաջարկություններ անում, որպեսզի ձախողվեին բանակցությունները»,- ասաց Վահրամ Բաղդասարյանը: Նրա խոսքով՝ եթե այդ պայմանները բավարարվեն, Հայաստանը երբեք դեմ չի գնա բանակցային գործընթացին:
Դիտարկմանը, որ փաստորեն առաջին անգամ Հայաստանն այս գործընթացում նախապայմաններ է թելադրում, նա պատասխանեց. «Սա նախապայման չէ: Մենք հորդորում ենք, ասում ենք՝ տեր կանգնեք ձեր ստորագրությանն ու պահպանեք ձեր խոստումները: Եթե մենք պետք է նստենք բանակցության սեղանին, և այնտեղ պետք է մեր զինվորը զոհվի կամ ավտոմատի ձեռքը կռիվ անի, մենք նման բանակցություններ չենք կարող վարել: Ասում ենք՝ երաշխիքներ տվեք, որ այս հրադադարը կայուն կլինի: Հաջորդն ասում ենք՝ հավասարության նշան են դնում, թե՝ վերջ դրեք պատերազմին: Մենք առաջարկում ենք, ինչը որ առաջարկել էր ԱՄՆ-ը և արդեն համաձայնել են Ֆրանսիան և Ռուսաստանը, որ հետաքննող սարքավորումներ տեղադրվեն, մոնիթորինգ արվի, թե ում կողմից է ագրեսիան սկսվում»,- ասաց նա:
Հարցին, թե կարո՞ղ ենք արձանագրել, որ Հայաստանի քաղաքականությունը փոխվել է այս հարցում, Բաղդասարյանը պատասխանեց. «Այո, նման քառօրյա պատերազմից հետո, նման լայնածավալ մասշտաբի, որի վտանգը դեռ չի անցել, այդ իսկ պատճառով հավատը հիմնովին կորել է, իհարկե մենք նրանց նկատմամբ միշտ էլ թերահավատ ենք եղել, բայց քառօրյա պատերազմից հետո մեր հավատն ամբողջովին կորել է, և բնականաբար, պետք է այս երեք պայմանները կատարվեն»:
Մանրամասները՝ տեսանյութում: