Ադրբեջանական Trend լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովը Մալթայի արտգործնախարար Ջորջ Վելայի հետ համատեղ մամուլի ասուլիսի ժամանակ հայտարարել է, որ Ադրբեջանը դուրս չի եկել բանակցային գործընթացից:
Մամեդյարովն ընդգծել է, որ բանակցությունների հարցում իրենց համար կարևորն արդյունքն է: «(Հայաստանի նախագահ Սերժ) Սարգսյանը երեք նախապայման է առաջադրել բանակցությունների վերսկսման համար: Նախապայմաններ առաջ քաշելով հարցը չես լուծի:
Ադրբեջանը երբեք չի հրաժարվել բանակցային գործընթացից: Եթե Երևանում ինչ-որ մեկը կարծում է, թե նախապայմաններ ներկայացնելով կարող է շարունակել բանակցային գործընթացն ու պահպանել ստատուս-քվոն, ապա նա սխալվում է:
Իր գործողություններով Հայաստանը սպառնալիքի տակ է դնում 1994-1995 թվականների հրադադարի ռեժիմի մասին համաձայնագիրը:
Հայերը պետք է հասկանան, որ անհնար է ռազմական ճանապարհով հասնել հակամարտության կարգավորմանը: Սակայն դա չի նշանակում, թե բանակցությունները կարող են շարունակվել անվերջ: Ադրբեջանն ամուր կերպով հավատարիմ է իր դիրքորոշմանը»,- ասել է նա: