Ռուսական ՌԲԿ-ն գրում է, որ 2015թ. Սամվել Կարապետյանին պատկանող «Տաշիր» խմբի կառույցները ստացել են շուրջ 53 մլրդ ռուբլու պետպատվերներ։ Ըստ Ֆորբսի՝ նա պետպատվերների ցուցակում Ռուսաստանում 9-րդն է։
Պարբերականը վերլուծել է «Տաշիրի» կազմի մեջ մտնող 18 ընկերությունները, որոնք իրականացրել են պետպատվեր: Պարզվել է, որ 2014-16 թթ. եռամսյակի ժամանակաշրջանում «Տաշիրի» ընկորությունները իրականացրել են 116 մլրդ ռուբլու պետպատվերի աշխատանք։
Պետպատվերի չափերով Կարապետյանին նախորդում է ադրբեջանցի Արաս Աղալարովը։
Կարապետյանը լրատվամիջոցի հետ զրույցում ասել է, որ ճգնաժամի ժամանակ իրենք փորձել են ավելացնել պետպատվերը։ Թե կոնկրետ ինչ են արել պետության համար՝ Կարապետյանը չի նշել։
Ըստ ՌԲԿ-ի հաշվարկների՝ պետպատվերը կազմում է «Տաշիր» խմբի շահույթի շուրջ 40%-ը։ Ըստ Ֆորբսի՝ Կարապետյանի հարստությունը գնահատվում է 3.1 մլրդ դոլար։
Սամվել Կարապետյանն իր բիզնեսը սկսել է Կալուգայից։ Կալուգացի նրա ծանոթներն ասում են, որ եթե գալիս են նրա մոտ գաղափարով, նախահաշվարկներով ու հաշվարկների փաթեթով, ապա Կարապետյանը վերցնում է գաղափարը և ինքն է այն իրականացնում։ Այս բիզնեսը փակ ցիկլի բիզնես է. ինքն է արտադրում շինանյութը, կառուցում շենքերը, մատակարարում հոսանքը, հետո էլ վարձով տալիս իր իսկ կինոթատրոններին ու մանկապարտեզներին։
«Ինչո՞վ է դա լավ: Սամվելը ինքնաբավ է, նա ունի և՛ էներգետիկա, և՛ շինարարություն, ամեն, ամեն ինչ»,- ասում է Կարապետյանի ընկերը՝ Ռուսաստանի հայերի Միության նախագահ Արա Աբրահամյանը։
ՌԲԿ-ի տվյալներով՝ Սամվել Կարապետյանը ծառայություններ է մատուցում այնպիսի պետական կառույցների, ինչպես Ռուսաստանի նախագահի աշխատակազմն է, Պահպանության Դաշնային ծառայությունը (ФСО), Գազպրոմը։ Պարբերականը նշում է, որ Կարապետյանը լավ ընկերներ ունի և՛ Կալուգայում, և՛ Մոսկվայում, և՛ Գազպրոմում։ Նա կարողանում է արագ հաղթահարել տարբեր բյուրոկրատական և այլ արգելքները։ Նրա բիզնես-գործընկերների շրջանակում լրատվամիջոցը նշում է նաև Ռուսաստանի գլխավոր դատախազի որդուն՝ սկանդալային հեղինակություն ունեցող Արտյոմ Չայկային։
