Թուրքական Star թերթի փոխանցմամբ՝ Թուրքիայի նախագահ Ռեջեփ Էրդողանը լրագրողների հետ զրույցում հայտարարել է, թե Հայաստանը «կրակի հետ է խաղում»՝ մեկնաբանելով Հայաստանի նախագահ Սերժ Սարգսյանի՝ «Մենք պատրաստ ենք Ադրբեջանի դեմ պատերազմին» հայտարարությունը:
«Սարգսյանը կրակի հետ է խաղում: Դիմակայությունն ավելի ուժեղ է դարձնում Ադրբեջանին ու Իլհամ Ալիևին: Ռուսաստանը բաց և ամբողջական աջակցություն չի ցուցաբերում Հայաստանին, որովհետև Ռուսաստանն Ադրբեջանի հետ ունի փոխշահավետ հարաբերություններ:
Ադրբեջանը նման չէ իր շրջակա մյուս երկրներին՝ Ուկրաինային կամ Վրաստանին: Ռուսաստանը չի կարողացել ցանկալի արդյունքների հասնել անգամ Ուկրաինայում: Նա միայն հաջողության է հասել Ղրիմում, ինչի պատճառը թաթար բնակչության փոքրաթիվ լինելն է: Ռուսաստանը սխալ է գործում»,- ասել է նա:
Էրդողանը հիշատակել է նաև Թուրքիայում ապրող հայերի մասին. «Թուրքիայում բնակվում է մինչև 100.000 հայ, որոնք մեր երկրի քաղաքացի չեն: Նրանցից 50.000-ը Թուրքիայի քաղաքացի չէ: Մենք հանդուրժողական վերաբերմունք ենք ցուցաբերում նրանց հանդեպ, որոնք չունեն մշտական բնակության թույլտվություն:
Մենք հայկական ծագմամբ Թուրքիայի քաղաքացիներին վերադարձրել ենք նրանց ֆոնդային գույքը, ինչի մասին ես հայտնեցի ապրիլի 24-ին: Մենք ցուցադրում ենք մեր բարի կամքը»: