Սմարթֆոնների մատակարարման համաշխարհային շուկան առաջին անգամ կրճատվել է 2016 թվականի առաջին եռամսյակում։ Այս մասին հայտնում է Reuters-ը՝ հղում անելով Strategy Analytics-ի տվյալներին։
Հունվար-մարտ ամիսներին շուկա է մատակարարվել 334.6 մլն սարք, անցած տարվա նույն ժամանակահատվածում այդ ցուցանիշը կազմել է 345 մլն։
Ինչպե նախկինում՝ սմարթֆոնների խոշորագույն արտադրող է մնում Samsung Electronics-ը, որի մատակարարումները, սակայն, ընկել են 4.5 տոկոսով՝ հասնելով 79 մլն սարքի։ Շուկայում Samsung-ի մասնաբաժինը անցած տարվա համեմատ ընկել է՝ 24 տոկոսից դառնալով 23.6 տոկոս։
Երկրորդ տեղում Apple-ն է։ Ընկերության կողմից սմարթֆոնների մատակարարումները նվազել են 16 տոկոսով՝ հասնելով 51.2 մլն սարքի։ Ընկերության մասնաբաժինը շուկայում ընկել է՝ 17.7 տոկոսից դառնալով 15.3 տոկոս։
Վերլուծաբանները կրճատումը կապում են սպառողների՝ համաշխարհային տնտեսության վիճակին առնչվող մտավախությունների, ինչպես նաև չինական շուկայի գերհագեցածության հետ։