«Մենք կցանկանայինք կիսել ԱՊՀ գործկոմի գործադիր քարտուղարի լավատեսական հայացքները ղարաբաղյան հակամարտության մասին և կարծում ենք, որ վերջին ժամանակները տարբեր ձևաչափերով տեղի ունեցած հանդիպումները, այդ թվում ՌԴ նախագահի մասնակցությամբ աստրախանյան հանդիպումը, որոշակի հույս են տալիս հետագա գործընթացների համար: Հակառակ դեպքում, Ադրբեջանի նախագահը նաև հայտարարել է, որ եթե զգացողություն առաջանա, որ այդ հանդիպումները չեն կարող արդյունավետ լինել, ապա դրանք կդադարեցվեն»,- հայտարարել է Ադրբեջանի նախագահի աշխատակազմի հասարակական-քաղաքական բաժնի ղեկավար Ալի Հասանովը: Նա մեկնաբանել է ԱՊՀ գործադիր կոմիտեի գործադիր քարտուղար Սերգեյ Լեբեդևի հայտարարությունն այն մասին, որ ձեռք բերված պայմանավորվածությունները ռազմագերիներին և մահացածների դիակները վերադարձնելու վերաբերյալ գրեթե առաջին քայլն են դիրքորոշումների մերձեցման համար, տեղեկացնում է ադրբեջանական APA գործակալությունը:
Հիշեցնենք, որ երեկ Բաքվում ԱՊՀ-ի գործադիր քարտուղար Սերգեյ Լեբեդևը հայտարարել էր. «ԱՊՀ-ն և առաջին հերթին Ռուսաստանը շահագրգռված են Ղարաբաղյան հակամարտության լուծմամբ: Մենք քայլ առ քայլ գնում ենք այդ երկու երկրների մերձեցման գործում: Վերջերս Աստրախանում Հայաստանի և Ադրբեջանի նախագահները ՌԴ նախագահի միջնորդությամբ պայմանավորվեցին զինվորականների մարմինների փոխանակման մասին, և դա գործնականում դարձավ առաջին քայլերը դիրքորոշումների մերձեցման համար: Դրանք փոքր քայլեր են, բայց դրա հետ մեկտեղ` մենք քննարկում ենք օկուպացված տարածքների ազատման, Ադրբեջանի և Նախիջևանի, Ղարաբաղի և Հայաստանի միջև միջանցքի ստեղծման հարցը»:
