Նոր մանրամասներ են ի հայտ գալիս Սևանում կատարված սպանության մասին. խոսքը նոյեմբերի 8-ին Սևան քաղաքի Նալբանդյան 33 շենքի 3-րդ հարկի 10-րդ բնակարանում 23-ամյա Արման Թորոսյանի կատարած հանցանքի մասին է, ով դաժանաբար խոշտանգել ու սպանել էր ծնողներին` 64-ամյա Խաչիկ Եգորի Թորոսյանին և 57-ամյա Մարիետա Մնացի Թորոսյանին: Մեր ունեցած տեղեկություններով, վեճի պատճառը ամենօրյա հացի խնդիրն է եղել, որն այդ ընտանիքը վաստակել է չափազանց մեծ դժվարությամբ. Արմանի հայրը չնչին գումարներով, նույնիսկ մեկ շիշ օղու դիմաց գերեզմաններ է փորել կամ պատահած որևէ գործ արել: Այդ օրն էլ տղան հորից գումար է ուզել, բայց քանի որ այն չի եղել, տանը կրկին վեճ է ծագել: Դրան գումարվել է նաև Արմանի 5 տարվա զայրույթը` կապված հոր ամուսնական ընտրության հետ. խորթ մորը նա չի ընդունել, և միշտ այդ առիթով վեճեր են եղել: Նաև խոսակցություններ են շրջանառվում, որ Արմանի ծնողներն են Եհովայի վկաներ եղել, ոչ թե Արմանը: Վերջինս նաև հոգեբուժարանում է հաշվառված եղել: Հիշեցնենք, որ հանցագործության վայրում հայտնաբերվել էր 3 կգ-անոց գազի բալոն` արյան հետքերով, որով էլ որդին, հավանաբար, հարվածել ու սպանել էր ծնողներին: Ոստիկանության քննչական գլխավոր վարչության Սևանի քննչական բաժնում հարուցվել է քրեական գործ` ՀՀ քր.օր.-ի 104 հոդվածի երկրորդ մասի առաջին կետով: Նշանակվել է նաև հոգեբուժական փորձաքննություն:
