Ադրբեջանական APA լրատվական գործակալության փոխանցմամբ, Nabucco Gas Pipeline İnternational GmbH կոնսորցիումը հայտարարել է գազատարի նախագծի ռեալիզացման նոր ժամկետի մասին: Այն մեկնարկելու է 2013 թվականին, իսկ գազատարով առաջին մատակարարումները կսկսվեն 2017 թվականին:
Նշվում է, որ նախագծի ռեալիզացման ժամկետը փոփոխելիս հաշվի են առնվել Կենտրոնական Ասիայում և Մերձավոր Արևելքում գազի արդյունահանման ժամկետները:
Հիշեցնենք, որ Nabucco գազատարը, ըստ նախագծի, ունենալու է 3,300 կիլոմետր երկարություն և տարեկան 31 միլիարդ խորանարդ մետր թողունակություն: Այն պետք է կասպյան ավազանի գազը հասցնի Եվրոպա` շրջանցելով Ռուսաստանի տարածքը: Նախագիծը գնահատված էր 7.9 միլիարդ եվրո, սակայն երեկ նշվեց, որ դա հասցվել է 12-15 միլիարդ եվրոյի:
Nabucco-ի կոնսորցիումի կազմում են ընդգրկված գերմանական RWE, ավստրիական OMV, թուրքական Botaş, ռումինական Transgaz, բուլղարական Bulgargaz և հունգարական MOL ընկերությունները:
Նախապես պլանավորված էր, որ Nabucco-ի կառուցումը մեկնարկելու է այս տարի, իսկ այն շահագործման է հանձնվելու 2014 թվականի վերջին կամ 2015 թվականի սկզբին:
