Մարտի 17-ին Արաբական Միացյալ Էմիրություններ մեկնելու նպատակով «Իրազեկ քաղաքացիական միավորում» կազմակերպության գլխավոր փորձագետ Կարեն Վարդանյանը տնից դուրս էր եկել և չէր վերադարձել: Նախօրեին ոստիկանության աշխատակիցները Երևանի Սիսակյան 22 շենքի մոտակայքում գտնվող ավտոտնակներից մեկում հայտնաբերել են բութ գործիքով բազմաթիվ հարվածներ ստացած և սպանված Կարեն Վարդանյանին:
Ավտոտնակը Կարենի հարևանինն է՝ Գևորգ Զոհրաբյանինը, վրայի հեռախոսահամարն էլ անհասանելի է, քանի որ Կարենի սպանության գործով ձերբակալվել են Գևորգ Զոհրաբյանը և նրա ընկեր Արթուր Միհրանյանը:
Ոստիկանության տարածած տեղեկության համաձայն՝ Կարենը սպանվել է հենց մարտի 17-ին , բայց մարտի 19-ին Կարենի ֆեյսբուքյան էջում հայտնվել է տեղեկատվություն նրա գտնվելու վայրի մասին, և այդ ժամանակ Կարենի ընկերների հետ ֆեյսբուքյան երկխոսության մեջ է մտել մարդասպանը:
«Մի քիչ իր ոճի մեջ չէր ինքը պատասխանում, ինքը հենց հասավ տեղ, իրա ասելով, գրեց ինձ՝ հասել եմ, գրեցի ինչպես ես, գրեց նորմալ ու չհարցրեց, թե ես ոնց եմ։ Կարենն ինձ միշտ հարցում էր, թե ես ոնց եմ: Ոչ ստանդարտ դիալոգ գնաց մեր մեջ»:
Նրա մահվան պատճառն իր միակ ունեցվածքն էր՝ բնակարանը: Կարենի ընկերը՝ Տաթևը, որը ժամանակավոր բնակվում էր Կարենի տանը, պատմում է, թե ինչ շփման մեջ են եղել Կարենն ու սպանության մեջ կասկածվող Գևորգ Զոհրաբյանը:
Կարենը մինչև վերջ ընկերներին չի պատմել իր ֆինանսական խնդիրների, բնակարանային հարցերի ու Գևորգի հետ բռնած գործերի մասին:
Սպանված Կարենի և կասկածյալ Գևորգի հարևանները դեպքից սարսափած են, տեսախցիկի առջև չեն խոսում, առանց տեսախցիկի են պատմում, որ Կարենն իրենց սիրելի հարևանն էր, իսկ Գևորգից նման բան չէին սպասոմ: