Ճապոնական Nissan-ը Հյուսիսային Ամերիկայի շուկայից արգելակների անսարքության պատճառով ավելի քան 47 հազար էլեկտրամոբիլ է հետ կանչում: Այդ մասին հայտնել են ընկերության ներկայացուցիչները, գրում է TASS-ը:
Սպասարկման ակցիան վերաբերում է Nissan Leaf 2013-2015 էլեկտրամեքենաներին, որոնք վաճառվել են ԱՄՆ-ում և Կանադայում: Ավտոարտադրող ընկերության ներկայացուցիչը նշում է, որ այդ ավտոմեքենաների շահագործման ժամանակ խիստ ցածր ջերմաստիճանի դեպքում դրանց արգելակները հնարավոր է չաշխատեն:
Ընկերությունը պարտավորվում է անվճար վերացնել այդ անսարքությունը, թեպետ Nissan-ին հայտնի չէ դեռ այդ անսարքության պատճառով վթարի որևէ դեպք: