Հայաստանում Իրանի Իսլամական արտակարգ և լիազոր դեսպան Սեյյեդ Քազեմ Սաջադին այսօր հյուրընկալվել էր Երևանի պետական համալսարանում՝ մասնակցելու Իրանի և Հայաստանի միջև դիվանագիտական հարաբերությունների հաստատման 25-ամյակին նվիրված միջոցառմանը, որի ընթացքում ճեպազրույց ունեցավ հայաստանյան լրատվամիջոցների հետ:
Ստորև ներկայացնում ենք ճեպազրույցի տեքստն ամբողջությամբ:
«Ազատություն» ռ/կ. – Պարոն դեսպան, Հայաստանը գազ-էլեկտրաէներգիա գործարքից դուրս բանակցություններ վարո՞ւմ է Իրանի հետ գազ գնելու շուրջ: Իրանի էներգետիկայի նախարարը վերջերս հայտարարեց, որ նախատեսվում է իրանական գազի ծավալների մեծացում: Ի՞նչ նկատի ուներ իրանական կողմը:
– Մենք այս պահի դրությամբ աշխատում ենք համագործակցել երկու երկրների միջև կնքված համաձայնագրի շրջանակներում: Գազ՝ էլեկտրաէներգիայի դիմաց. այս պայմանագրի շրջանակներում շարունակվելու է համագործակցությունը, և կփորձենք ընդլայնել այդ համագործակցությունը: Անշուշտ, եթե ապագայում որոշումներ կայացվեն, այդ մասին ձեզ կտեղեկացնենք:
«Արարատ» հեռուստաընկերություն. – Պատժամիջոցների վերացումից հետո տնտեսական հարաբերությունների նոր հարթակ բացվեց, մի քանի ուղղություն նշվեց, ավելի մանրամասն կնշե՞ք՝ ո՞ր ուղղություններն են ռեալ տնտեսական համագործակցության շրջանակում:
– Իրանը և Հայաստանը համարում ենք հարևան երկրներ, և միմյանց հետ տնտեսական հարաբերություններ զարգացնելու առումով որևէ սահմանափակում չունենք: Հաշվի առնելով, որ վերջին ժամանակահատվածում ակտիվացել են երկու երկրների բարձրաստիճան պաշտոնյաների փոխադարձ այցերը, մենք մոտ ապագայում ականատես կլինենք երկու երկրների հարաբերությունների առավել զարգացմանը: Ես կարծում եմ, որ երկու երկրներն էլ կօգտվեն միմյանց հնարավորություններից:
Հանրային հեռուստաընկերություն. – Իսկ քաղաքական տեսանկյունից՝ Հայաստան-Իրան հարաբերությունները ի՞նչ փոփոխություն կկրեն պատժամիջոցների վերացումից հետո:
– Մենք անգամ պատժամիջոցների ժամանակ շատ լավ հարաբերություններ ենք ունեցել Հայաստանի հետ, իսկ պատժամիջոցների չեղարկումից հետո այդ հարաբերություններն էլ ավելի կզարգանան: Իրանը և Հայաստանը ամենածանր պայմաններում և ծանր վիճակներում միշտ օգնել են միմյանց, և այդ համագործակցությունը, այդ վերաբերմունքը կշարունակվի:
«Ազատություն» ռ/կ. – Պարոն դեսպան, գազի բանակցությունները միայն գազ-էլեկտրաէներգիա գործարքի շրջանակներում է, թե՞ հնարավոր է՝ նաև այդ գործարքից դուրս բանակցություններ տարվեն, այսինքն՝ Հայաստանը ուղիղ գազ գնի Իրանից իր կարիքների համար:
– Այս պահի դրությամբ մենք համագործակցում ենք այն համաձայնագրի շրջանակում, որը կնքվել է երկու երկրների միջև: Անշուշտ, եթե ապագայում որոշումներ կայացվեն, անպայման կտեղեկացնենք ձեզ այդ մասին:
«Արարատ» հեռուստաընկերություն. – Իրան-Հայաստան երկաթգծի կառուցման առումով Իրանն ի՞նչ ծրագեր ունի. իր կողմից կսկսի՞ երկաթգծի կառուցումը՝ անկախ նրանից՝ Հայաստանը կսկսի թե ոչ:
– ՀՀ տրանսպորտի նախարարը և Իրանի ճանապարհների և քաղաքաշինության նախարարը բանակցել են այդ հարցի շուրջ: Մոտ ապագայում նախատեսվում է Իրանից փորձագետների և մասնագետների պատվիրակության այցը Հայաստան՝ տնտեսատեխնիկական հիմնավորումներն ուսումնասիրելու:
«Արարատ» հեռուստաընկերություն. – Իսկ Մեղրիի ՀԷԿ-ի հետ կապված՝ ի՞նչ աշխատանքներ կտարվեն:
– Միջկառավարական հանձնաժողովի նիստի ժամանակ երկու երկրների նախարարները խոսել, բանակցել են այդ հարցի շուրջ: Եթե որոշում կայացվի, այդ մասին ԶԼՄ-ներին կտեղեկացվի: