Հռոմի պապ Ֆրանցիսկոս մարտի 1-ին կներկայացնի նոր գիրք, որը կներառի աշխարհի տարբեր ծայրերի երեխաներից իրեն ուղղված նամակներում տեղ գտած հարցերն ու դրանց պատասխանները:
Quartz-ի փոխանցմամբ՝ գրքում տեղ կգտնեն նաև երեխաների նկարազարդումները: «Սիրելի Ֆրանցիսկոս պապ» անվանումով գիրքը արտահայտում է դեռահաս կաթոլիկների անհանգստություններն ու հարցադրումները, որոնց պապն առաջարկում է պատասախանների խորություն, ինչից նույնիսկ ոչ հավատացյալները կարող են դասեր քաղել:
«Կարո՞ղ է իմ ոչ կաթոլիկ պապիկը, ով ընդունակ չէ վատ արարքի, դրախտում հայտնվել, երբ մահանա» հարցին, որն ուղղել է չինացի 13-ամյա Իվանը, Հռոմի պապը պատասխանել է. «Հիսուսը ցանկանում է, որ մենք բոլորս գնանք դրախտ»: «Եթե Աստված սիրում է մեզ այդքան շատ և չի ցանկանում, որ մենք տառապենք, ինչու նա դեռ չի հաղթել սատանային». պերուացի 9-ամյա Ալեխանդրան է հարցրել: Այս հարցին էլ Ֆրանցիսկոս պապը պատասխանել է հետևյալ կերպ. «Սատանան նման է վիշապի, որը շարժում է իր պոչը մահից հետո»: «Ինչու է Աստված ստեղծել մեզ` իմանալով, որ մենք պետք է մեղանչենք նրա դեմ». հարցրել է 10 տարեկան Մաքսիմուսը Սինգապուրից: Պապի պատասխանը. «Աստված մեզ տվել է ազատություն, ինչը նշանակում է նաև մեղքն ընտրելու ազատություն»: Կանադացի 8-ամյա Ռայանը հարցրել է. «Ինչ արեց Աստված մինչ աշխարհը ստեղծելը», որին ի պատասխան պապը ասել է. «Նա սիրեց»:
«Ինչու այլևս չկան շատ հրաշքներ»,- հարցրել է պերուացի 9-ամյա Ժուակինը: «Դա ճիշտ չէ»,-պատասխանել է Հռոմի պապը: «Կարո՞ղ է աշխարհը լինել առաջվա պես»,-հարցրել է 10-ամյա Մուհամմադը Սիրիայից, որին պապը բացասական պատասխան է տվել։