Ադրբեջանում հանրության որոշ խավի համար շուտով հարկ կլինի սնունդ գնել ապառիկով: Ադրբեջանի շրջաններում և քաղաքներում որոշ փոքր խանութներում վաճառողները ծանոթ քաղաքացիներին մթերքը պարտքով են տալիս, իսկ նրանք հետո աստիճանաբար վերադարձնում են պարտքը: Ճգնաժամի պայմաններում Ադրբեջանում խոշոր խանութները ևս կարող են անցնել մթերքի ապառիկ վաճառքի: Դա կլինի անտոկոս ապառիկ կամ առավելագույնը`5 տոկոսով: Այս մասին հայտնում է exo.az-ը՝ հղում անելով Ադրբեջանի ազատ սպառողների միության ղեկավար Էյուբ Հուսեյնովին:
Նրա խոսքով`ապառիկով սնունդ գնելու քարտերը պետք է լինեն առավելագույնը 50 մանաթ նոմինալով`մինչև մեկ ամիս վճարելու ժամկետով, և դա պետք է հիմնականում վերաբերի խոշոր խանութներին:
Ադրբեջանի կայուն զարգացման հետազոտությունների կենտրոնի նախագահ Նարիման Աղաևն էլ իր հերթին հայտնել է, որ Ադրբեջանում պարտքով սնունդ տալու գաղափարը նոր չէ, այն հնավանդ սովորույթ է: