Georgia Online-ի փոխանցմամբ՝ Վրաստանում Իրանի դեսպան Աբաս Թալեբի Ֆարին հայտարարել է, որ գոյություն ունեն Իրանից Վրաստան բնական գազ մատակարարելու տեխնիկական հնարավորություններ։ Դեսպանն ընդգծել է, որ գոյություն ունեն որոշակի երթուղիներ, որոնցով կարելի է իրանական գազ մատակարարել Վրաստանին:
«Կարելի է օգտագործել հայկական երթուղին, կարող են օգտագործել ադրբեջանական ենթակառուցվածքները։ Այդ տեսանկյունից կլինի դա Հայաստանը կամ Ադրբեջանը, կլինի համագործակցության եռակողմ ձևաչափ»,- ասել է դեսպանը։
Գոյություն ունի նաև երրորդ հնարավորությունը՝ սվոփի (փոխանակման) սկզբունքը, և այդ դեպքում համագործակցությունը պետք է լինի Իրանի, Վրաստանի, ռուսական «Գազպրոմի» ու Հայաստանի միջև»։ Դեսպանն ընդգծել է, որ վերջին տարբերակն առավել իրատեսական տարբերակ է։
Իրանի դեսպանը հավելել է, որ հնարավոր է Վրաստանի ու Իրանի միջև բարտեր, որպեսզի Իրանը ստանա ջրային ռեսուրսներ, իսկ Վրաստանը փոխարենը ստանա գազ կամ էլեկտրաէներգիա։