Դիլիջանի ներկա քաղաքապետի մրցակից, նախկին քաղաքապետ Ժորա Սահաբալյանն ահազանգում է, որ ներկա քաղաքապետ Արմեն Սանթրոսյանի կողմնակիցները քաղաքում աշխատողներին վախեցնում են, որ իր հանդիպումներին չգնան: «Վախեցնում են մարդկանց, թե աշխատանքից կհանենք, էս կանենք»,- մեզ հետ զրույցում բողոքեց թեկնածուն:
Համայնքների խոշորացման որոշման արդյունքում այս կիրակի՝ փետրվարի 14-ին Դիլիջանի քաղաքապետի պաշտոնի համար կմրցեն ներկա քաղաքապետ Արմեն Սանթրոսյանն ու նախկին քաղաքապետ, անկուսակցական Ժորա Սահաբալյանը: Արմեն Սանթրոսյանին առաջադրել է ՀՀԿ-ն: Դեռ կոալիցիա չկազմած՝ ՀՅԴ-ի Դիլիջանի կառույցը քաղաքական որոշում է կայացրել, որ սատարելու է Սանթրոսյանի թեկնածությունը: Վերջինս Դիլիջանի քաղաքապետն է 2005 թվականից:
Դիլիջանի նախկին քաղաքապետ Ժորա Սահաբալյանին սատարելու մասին դեռ ոչ մի քաղաքական որոշում չի եղել: Նա նախկինում հանրապետական է եղել, սակայն 2012-ին լքել է ՀՀԿ-ի շարքերն ու միացել ԲՀԿ-ին: Այժմ էլ անկուսակցական է:
Դիլիջանի ներկա քաղաքապետ Արմեն Սանթրոսյանը, ավելի վաղ մեզ հետ զրույցում «անհնար է համարել» իր պարտությունը:
«Ժողովուրդն ում ընտրի, նա էլ ընտրվելու ա: Նրա ինքնավստահությունը հիմնավորված ա նրանով, որ կարեցել ա խախտում անի, խախտումով ընտրվի, բայց հիմա շատ խիստ ա կառավարության կողմից դրված: Հսկողությունը շատ լուրջ ա, նենց որ դժվար ա լինելու էդ ճանապարհով առաջ գնալ»,- ասաց Սահաբալյանը: Ավելին, Սահաբալյանը կարծում է, որ հենց ինքն է հաղթելու. «Ավելի լավը ո՞րն ա: Հաղթել պրծել եմ արդեն: Ես ժողովրդական տղա եմ, ժողովուրդն ինձ ընտրել ա ու ընտրելու ա հույս ունեմ»:
Ըստ նրա՝ ներկա քաղաքապետը «շատ մեծ խախտումներով» է նախկինում ընտրվել: «Երբ որ ընտրատարածքում 400 ձայն ինձնից ավելի ա, դա չլինող բան ա, որ քաղաքի մի տարածքում 400 մարդ ինձ դեմ լինի: Ժողովուրդը մինչև հիմա իմ աշխատած տարիների մասին է խոսում»,- հավաստիացրեց թեկնածուն:
Ինչ վերաբերում է ներկա քաղաքապետ Արմեն Սանթրոսյանի պնդումներին, որ ինքը խոշոր ծրագրեր է արել քաղաքի համար, նախկին քաղաքապետը դրան չի հավատում. «Եթե դպրոց են կառուցում միջազգային՝ ինքն ի՞նչ կապ ունի էդ ծրագրի հետ, բանկը կառուցում են, ինքն ի՞նչ կապ ունի: Ոչ մի բան ինքը չի արել, թող ասի, թե քաղաքի բյուջեն որտեղ ա ծախսել: Եթե քաղաքը չի մաքրվում, չի բարեկարգվում, որտեղ ա էտ գումարները ծախսվում: Առողջարանային քաղաքում դա պիտի արվի, որ մարդը գա, բավականություն ստանա: Եթե էդ ամեն ինչը չկա, բյուջեն ո՞ւր է գնացել»:
Դիլիջանի քաղաքապետի թեկնածուն պնդում է, որ քաղաքապետն ակնոցներ է բաժանում գյուղերում. «Ինքը դրած իր կնոջ հետ ակնոցներ ա բաժանում, ես անձամբ տեսել եմ: Թող բաժանի, թող ժողովուրդն օգտվի»:
Սահաբալյանը հավաստիացնում է, որ ՀՀԿ-ն այսօր իրեն դեմ չէ. «ՀՀԿ-ն կողմ է, որ ում ժողովուրդն ընտրի, նա էլ ընտրվի: Էն ժամանակ կոալիցիա էր, մտա, էն ժամանակ ԲՀԿ-ն հանրապետական էր, տարբերություն չկար: Էսօր ավելի խստացված է, մենք էլ ունենք մարդիկ, որ էդ ամեն ինչը կարան պահեն»:
