Ինչպես սպասվում է, այսօր Սերժ Սարգսյանը կհայտարարի ՀՅԴ-ի հետ կոալիցիոն համաձայնության մասին, որի շրջանակում սպասվում է, որ Շիրակի մարզը կփոխանցվի ՀՅԴ-ին: Մյուս կողմից, ինչպես արդեն անդրադարձել ենք, Շիրակի մարզում շատերը չեն ուզում, որ մարզպետ Ֆելիքս Ցոլակյանը հեռանա: Անգամ տեղեկություն կա, որ գյուղապետերը գնացել են մարզպետարան, պատրաստակամություն են հայտնել մինչև կառավարություն բողոքելու, որպեսզի Ցոլակյանը չհեռանա:
Գյումրու նախկին քաղաքապետ Վարդան Ղուկասյանը մեր դիտարկմանը, թե իր կարծիքով՝ ինչո՞ւ է Ցոլակյանի համար շիրակցիների սիրտն այդքան ցավում, իսկ իր հեռանալու դեպքում այդպես չէր, ասաց. «Շիրակի մարզը էնքա՜ն լավ վիճակի մեջ է: Խելագարված են, չէ՞: Այնքան սոցիալապես լավ վիճակի մեջ է Շիրակի մարզը, դրա համար էլ խելագարվում են: Ղեկավարի անունը որ տալիս են, ժողովուրդն ընկնում է ոտքերը ղեկավարների, որովհետև իրենց վիճակն էնքան լավ է, որ էդպես է»:
Ինչ վերաբերում է Ցոլակյանի գործունեությանը, ապա Վարդան Ղուկասյանը խուսափեց պատասխանից. «Ես քաղաքականությամբ չեմ զբաղվում, Ֆելիքս Ցոլակյանին որպես անձ հարգում եմ: Ամենակարևորը, որ խառնակչությամբ չի զբաղվել, մարդկանց չի խառնել: Մնացածը տենց արտառոց բան չեմ կարող ասել»:
Մեր դիտարկմանը՝ սակայն, փաստորեն, գյումրեցիները նման վարք չդրսևորեցին, երբ իրեն էին հանում քաղաքապետի պաշտոնից, Ղուկասյանը հայտարարեց. «Էդ ձեզ է թվում: Կակռազ գյումրեցիները մինչև էսօր ողբում են»:
Նախկին քաղաքապետն այսօր հետևյալ հարցն է ուզում ուղղել իշխանությանը. «30 տարին չլրացա՞վ, որ լենինականցիները սոցիալապես ամենավերջին տեղում են: Ինչքան պիտի մենք էսպես, միայն չայով ապրի էս ժողովուրդը՝ առանց շաքարի»:
Մեր դիտարկմանը, թե, օրինակ, ինքը բավական հարստացավ նույն Գյումրին ղեկավարելու տարիներին, Ղուկասյանը հայտարարեց. «Ես էն գլխից հարուստ եմ եղել՝ և՛ հոգեպես, և՛ ֆինանսապես, և ամեն ինչ ունենալով եկել եմ ու իմ վերջինը տվել եմ իմ ժողովրդին»:
Չնայած դրան՝ Վարդան Ղուկասյանը բավական հարուստ հեռացավ քաղաքապետի պաշտոնից: