Կենտրոն և Նորք Մարաշ վարչական շրջանների ընդհանուր իրավասության դատարանը հետաձգեց «Նոր Հայաստան» հանրային փրկության ճակատի ակտիվիստ Գևորգ Սաֆարյանի խափանման միջոց կալանքը գրավով փոխելու փաստաբանի միջնորդությունը։ Գործով քննիչը չէր ներկայացել դատարան։ Գևորգ Սաֆարյանի փաստաբան Տիգրան Հայրապետյանը քննիչի նիստին չներկայանալու մեջ միտում է տեսնում։
Հունվարի 3-ից հետո, երբ կալանավորվեց Գևորգ Սաֆարյանը, առ այսօր որևէ քննչական գործողություն նրա նկատմամբ չի կատարվել։ Ոչ էլ, առ այսօր առերեսում է եղել ոստիկանության «հրեշտակների» գումարտակի հրամանատար Գեղամ Խաչատրյանի հետ, որը, ըստ մեղադրանքի տուժել էր Գևորգ Սաֆարյանի հարվածներից։ Հայրապետյանի խոսքերով՝ սա վառ ապացույց է, որ այս քրեական գործը պարզապես ակտիվիստին մեկուսացնելու փորձ է։
Գևորգ Սաֆարյանի խափանման միջոցի քննարկմանը դատարանի բակում սպասում էին մեծ թվով ակտիվիստներ և «Նոր Հայաստան»-ի անդամներ։ Վերջիններիս խոսքերով՝ ակտիվիստի նկատմամբ հարուցված քրեական գործն ի սկզբանե շինծու է եղել, իսկ հիմա, այս ձգձգումներով փորձ է արվում ելք գտնել ստեղծված իրավիճակից։
Դատարանի բակում ակցիայի մասնակից, «Նոր Հայաստան» հանրային փրկության ճակատի միասնական շտաբի պետ Ժիրայր Սեֆիլյանն էլ վստահ է, որ Գևորգ Սաֆարյանի գործը դատարան չի հասնի և նրա ազատության մեջ հայտնվելն օրերի հարց է։
Նշենք, որ վերջին օրերին Գևորգ Սաֆարյանի նկատմամբ հետապնդումները քրեակատարողական հիմնարկում դադարեցվել են, ինչը կալանավորման առաջին օրերին աննախադեպ բնույթ էր կրում։