ՀԱՊԿ գլխավոր քարտուղար Նիկոլայ Բորդյուժան այսօրվա ասուլիսում (http://www.1in.am/1839308.html) հաստատեց, որ հաջորդ տարի դադարեցնելու է իր լիազորությունները, և որ 2017 թվականից գլխավոր քարտուղարի պաշտոնը ռոտացիոն սկզբունքով կստանձնի այլ պետության ներկայացուցիչ: Ըստ այբբենական կարգի՝ հաջորդ գլխավոր քարտուղարը լինելու է Հայաստանի Հանրապետության ներկայացուցիչը:
Հիշեցնենք, որ Հայաստանի ներկայացուցիչը դեռ նախորդ տարվա վերջին պիտի նշանակվեր այդ պաշտոնում, սակայն դեկտեմբերի 21-22-ին Մոսկվայում կայացած ՀԱՊԿ գագաթնաժողովի ժամանակ անդամ-պետությունները որոշեցին մեկ տարով հետաձգել Հայաստանի ներկայացուցչի նշանակումը՝ Թուրքիայի հետ հարաբերությունների սրման պատճառով:
Անդրադառնալով այս հարցին՝ նա հերքեց, որ Հայաստանի ներկայացուցչին չնշանակելը կապված է եղել Թուրքիայի հետ՝ նշելով, որ Սերժ Սարգսյանը այդ գագաթնաժողովի շրջանակներում Թուրքիայի կողմից ռուսական ռազմական ինքնաթիռի կործանումը դատապարտեց ՀԱՊԿ բոլոր անդամ-պետությունների ղեկավարների անունից:
«Հավաքական անվտանգության խորհուրդը հնչեցրել է Սիրիայի երկնքում թուրքական օդուժի կողմից ռուսական ռմբարկուի կործանման հարցով իր դիրքորոշումը դեկտեմբերին՝ Մոսկվայի նիստից հետո, որտեղ Սերժ Ազատի Սարգսյանը շատ հստակ ներկայացրել է պետությունների ղեկավարների դիրքորոշումը: Այդ դիրքորոշումը համաձայնեցվել էր նախագահների հետ, և նա արել է այդ հայտարարությունը ոչ թե իր, այլ բոլոր նախագահների անունից»,- ասաց Նիկոլայ Բորդյուժան:
