Ռուսական RIA Novosti լրատվական գործակալության փոխանցմամբ՝ ռուս հումորիստ Ալեքսեյ Ստոլյարովը, ով համացանցում հայտնի է որպես Լեքսուս, «Գովորիտ Մոսկվա» ռադիոկայանի եթերում պատմել է, թե ինչպես է իրեն ու Վլադիմիր Կուզնեցովին (Վովան) հաջողվել զանգահարել Թուրքիայի նախագահ Ռեջեփ Էրդողանին։
Այդ հեռախոսազանգերի ժամանակ ռուս հումորիստներն Էրդողանին ներկայացել են որպես Ուկրաինայի նախագահ Պյոտր Պորոշենկո ու վարչապետ Արսենի Յացենյուկ։
Լեքսուսը պատմել է. «Սա առաջին ու վերջին դեպքը չէ, որ մեզ հաջողվում է զանգահարել… Բնականաբար, դա չի արվում մեկ զանգից։ Զանգերը պետք է լինեն մի քանիսը»։ Նա ընդգծել է, որ մի շարք նախագահներ օգտվում են բջջային հեռախոսներից.
«Պորոշենկոյին մենք նույնպես զանգել ենք։ Անգամ ինքնաթիռում գտնվելիս է հաջողվել զանգել, երբ նա Ատլանտիկայի վրայով թռչում էր դեպի Ամերիկա»։
Հումորիստի խոսքով՝ անհրաժեշտ մարդու հետ կապ կարելի է հաստատել տարբեր եղանակներով. «Զանգահարել կարելի է ընդունարանի կամ այլնի միջոցով, կան լեգենդներ։ Կարելի է հավաքագրել շատ մարդկանց։ Սխեման այդպիսին է, և այն աշխատում է»։
Թուրքական կողմը հերքել է ռուս հումորիստների կողմից Էրդողանին զանգահարելու լուրերը։