Թուրքիայի մեջլիսի հայ պատգամավոր Գարո Փայլանը հերքել է ԶԼՄ-ներում տարածված տեղեկությունն այն մասին, թե Ստամբուլի Շիշլի թաղամասում պոլսահայ Դեմիրջի ընտանիքի վրա հարձակման ժամանակ ընտանիքի անդամների դեմ կիրառվել է «խոզի կապանք»: Այս մասին տեղեկացնում է «Ակոս» պարբերականը:
«Նրանց նկատմամբ «խոզի կապանք» չի կիրառվել, ձեռքերն ու ոտքերը կապված են եղել սովորական պարանով: Բերանները ևս փակած են եղել»,- ասել է Փայլանը՝ նշելով, որ որպես տեղի հայկական համայնք՝ իրենք պետք է քննարկեն կատարվածը:
Ժողովուրդների դեմոկրատական կուսակցությունից ընտրված պատգամավորը նաև հաստատել է, որ հարձակում իրականացնելու գործով ձերբակալված բոլոր կասկածյալները Հայաստանի քաղաքացիներ են:
Դեմիրջի ընտանիքի բարեկամներից մեկն «Ակոս»-ին հայտնել է, որ իրենք դեռևս չգիտեն Հակոբ Դեմիրջիի մահվան հստակ պատճառը: «Հարձակումից մեկ օր հետո նրա դին դիահերձարանից վերցրինք: Ոչ ոստիկանությունը, ոչ էլ որևէ մարմին չի հաղորդում, թե որն է Հակոբ Դեմիրջիի մահվան պատճառը: Դա կարող ենք իմանալ միայն դատաբժշկական փորձաքննությունից հետո, սակայն այդ գործընթացը 1,5 ամիս կտևի»,- ասել է նա:
Փետրվարի 6-ին Շիշլիի Ջումհուրիեթ փողոցի տներից մեկում բնակվող 85-ամյա հայ Հակոբ Յաքուփ Դեմիրջիի և 79-ամյա Սեդա Աիդա Դեմիրջիի տան վրա հարձակում էին գործել և տանից վերցրել թանկարժեք իրեր ու գումար: Կատարվածի մասին ահազանգել էր տան աշխատողը, ով հերթական անգամ եկել էր պոլսահայ զույգի տուն, սակայն դուռը նրա առջև ոչ ոք չէր բացել: Հակոբ Դեմիրջին մահացել էր, իսկ նրա կնոջը հոսպիտալացրել էին:
Հանցագործությունից հետո թուրքական ոստիկանությունը հետաքննություն էր սկսել հարձակվողներին հայտնաբերելու նպատակով: Տարածքի տեսախցիկների ձայնագրություններից իրավապահները ընկել էին նրանց հետքի վրա: Հայտնի էր դարձել նաև, որ հարձակում իրականացրած երեք անձինք մեքենա էին վարձել և Ստամբուլից ուղևորվել էին Տրապիզոն: Հենց այդտեղ էլ ոստիկանությունը նրանց ձերբակալել է: Հանցագործները կեղծ փաստաթղթերով նպատակ են ունեցել Տրապիզոնից գողոնով փախչել Վրաստան: Ձերբակալվել են նաև Ստամբուլում հանցագործության իրականացմանն աջակցած, մեքենա վարձած և արտասահման փախչելու հարցում նրանց օգնած 5 անձինք: