Գյումրիում տեղակայված ռուսական 102-րդ ռազմաբազան, ՀԱՊԿ գլխավոր քարտուղար Նիկոլայ Բորդյուժայի խոսքով, ոչ թե թուրքական բանակին դիմակայելու, այլ տարածաշրջանում կայունություն ապահովելու համար է: Այս մասին Նիկոլայ Բորդյուժան ասաց այսօրվա ասուլիսի ընթացքում՝ պատասխանելով հարցին, թե որքանով է հավանական Սիրիայի շուրջ ռուս-թուրքական հնարավոր պատերազմը:
ՀԱՊԿ գլխավոր քարտուղարը նշեց, թե հույս ունի, որ Ռուսաստանի և Թուրքիայի միջև խնդիրները կկարգավորվեն քաղաքական ճանապարհով, և ինքը չի կարծում, թե ճիշտ է քննարկել ռուս-թուրքական ռազմական դիմակայության սցենարները:
«102-րդ ռազմաբազայի պոտենցիալը, կարծում եմ, բավարար է՝ նրա վրա դրված առաջադրանքները կատարելու համար: Առավել ևս՝ 102-րդ բազան ոչ թե թուրքական բանակին դիմակայելու, այլ տարածաշրջանում կայունություն ապահովելու համար է, և եթե այն գործի, ապա, բնականաբար, գործելու է այլ միջոցառումների շրջանակում, որոնք ձեռնարկվելու են տարածաշրջանի երկրների, այդ թվում՝ Ռուսաստանի ղեկավարության կողմից: Այնպես որ, չեմ տեսնում այնտեղ ուժեր կուտակելու որևէ անհրաժեշտություն»,- ասաց Նիկոլայ Բորդյուժան:
Պատասխանելով հարցին, թե 102-րդ ռազմաբազայի ռազմատեխնիկական համալրումը որևէ կերպ կապ ունի՞ ռուս-թուրքական լարվածության հետ, Նիկոլայ Բորդյուժան ասաց, որ ոչ թե ռազմաբազան է ամրապնդվում, այլ պարզապես ստորաբաժանումները մատակարարվում են ամենաժամանակակից սպառազինությամբ, և ապահովվում է նրանց մարտական պատրաստվածության բավարար մակարդակը. «Խոսքը պլանային աշխատանքի մասին է: Ի դեպ, որպես զինվորական կարող եմ ասել, որ մարտական պատրաստվածության, հագեցվածության ցանկացած միջոցառում անցնում է հետևողական: Ես չեմ ասում, թե օրինակ՝ 102-րդ ռազմաբազան ինչ-որ արտասովոր ծրագրով մեծացնում է իր ռազմական պոտենցիալը: Ինձ նման բան ամեն դեպքում հայտնի չէ»: