Իր պաշտոնավարման առաջին իսկ տարում Սերժ Սարգսյանը խոսեց նոր ատոմակայանի կառուցման անհրաժեշտության մասին: Հայաստանի ատոմային էլեկտրակայանի երկրորդ էներգաբլոկը շահագործման է հանձնվել 1980թ.՝ 30 տարի շահագործման նախագծային ժամկետով: Հաշվի առնելով այն հանգամանքը, որ այդ էներգաբլոկը 1989–1995թթ. ժամանակահատվածում չի աշխատել, շահագործման ժամկետի ավարտը սահմանվել է 2016թ. սեպտեմբերը: Սակայն հետագայում՝ 2013 թվականին, նշվեց շահագործումը մինչ 2019 թվականը երկարաձգելու մասին:
Կառավարության այսօրվա նիստին էլ պետք է քննարկվեր ու հաստատվեր նոր ատոմակայանի կառուցման ծրագիրն ու կառուցման պլանի ժամանակացույցը: Նոր էներգաբլոկը հանված նախագծով նախատեսում էր կառուցել մինչև 2026 թվականը, սակայն Էներգետիկայի նախարար Երվանդ Զախարյանը, օրակարգի քննարկումը դեռ չմեկնարկած, խնդրեց հանել նախագիծը: Կառավարությունը հանեց այս հարցը օրակարգից:
Նախագծում նշվում էր, որ մեր երկրում միջուկային նոր էներգաբլոկի կառուցումը պայմանավորված է «Հայաստանի Հանրապետության էներգետիկ անվտանգության ապահովման հայեցակարգով»:
Բնապահպան Կարինե Դանիելյանը, խոսելով հին ատոմակայանի շահագործման ժամկետը երկարաձգելու մասին, նշեց՝ այն երկար շահագործվել չի կարող:
Նոր ատոմակայանի կառուցմանը դեմ լինելու համար բնապահպանը մի շարք՝ էկոլոգիական մաքրությամբ պայմանավորված պատճառներ բերեց, բայց, միաժամանակ, դրա կառուցման անհրաժեշտություն տեսնում է:
Կարինե Դանիելյանի դիտարկմամբ՝ հին էներգաբլոկն այսօր վտանգավոր չէ՝ վերակառուցման համապատասխան աշխատանքների շնորհիվ, սակայն շահագործման ավարտից հետո առաջացած թափոններն իրենցից մեծ վտանգ են ներկայացնելու շրջակա միջավայրի համար:
Ատոմակայանի դերը Հայաստանի համար եղել և մնում է չափազանց կարևոր: Փաստում է «Հայաստանի վերականգնվող էներգետիկայի հիմնադրամ» ծրագրի ղեկավար Արա Մարջանյանը: Ժամանակի ընթացքում տեխնիկական վերազինման անհրաժեշտություն է առաջանում:
Էներգաբլոկի շահագործման երկարաձգումը 10 տարով, փորձագետի կարծիքով, իրատեսական է, եթե լինեն համապատասխան ֆինանսական միջոցներ և տեխնիկական վերազինում: Իսկ նորի կառուցումը հին էներգաբլոկի շահագործման ավարտին անհրաժեշտություն է՝ հաշվի առնելով նաև Հայաստանի տարածքային անվտանգությանը նպաստող՝ ատոմակայանի զսպող գործոնը:
