Ադրբեջանական APA լրատվական գործակալության փոխանցմամբ՝ թուրքական Sabah իշխանամետ թերթը ներողություն է խնդրել Ադրբեջանից։ Դրանում նշված է, որ փետրվարի 6-ին թերթում հրապարակվել է «Մենք օգտագործում ենք զբոսաշրջային ոլորտում Թուրքիայի փորձը» խորագրով հոդված, որում պատկերվել է Ադրբեջանի «սխալ» քարտեզը։
Մասնավորապես այդ քարտեզում Ադրբեջանի կազմում չեն ընդգրկվել Լեռնային Ղարաբաղն ու հարակից շրջանները։ Դրա հետ կապված՝ Անկարայում Ադրբեջանի դեսպանատունը բողոք է հղել թերթի խմբագրությանը, ինչից հետո թերթն ուղղել է «սխալը» և ներողություն խնդրել ադրբեջանական կողմից։
Հաղորդվում է, որ Sabah-ի հոդվածը նվիրված է եղել Ստամբուլում Համաշխարհային զբոսաշրջային ֆորումի շրջանակներում նախարարների մասնակցությամբ պանելային քննարկումներին։ Հոդվածում տեղ գտած լուսանկարում երևում է, որ նիստին մասկացում են Թուրքիայի, Գանայի, Մակեդոնիայի ու Ադրբեջանի նախարարները, իսկ հետին պլանում պատկերված են այդ երկրների քարտեզները։