«Մինչ օրս, բացի զեկույցի նախապատրաստումից, մենք զբաղված էինք նաև բազմաթիվ բողոքներով՝ այդ թվում՝ մոտ 67 գործով վարչական դատարան բողոքներ ներկայացնելով, և հիմա պետք է ձեռնամուխ լինենք քրեական գործերով հաղորդումների ներկայացմանը,- «Առաջին լրատվական»- ի հետ զրույցում տեղեկացրեց «Իրավունքի Եվրոպա» միավորման ներկայացուցիչ , իրավաբան Տիգրան Եգորյանը: – Հույս չեմ հայտնում, որ այսպիսի ընտրություններով հանրաքվե անցկացնող ուժը, որը ըստ էության ժողովրդի իշխանությունը յուրացրել է, քաղաքական կամք կդրսևորի: Նրա կարծիքով՝ գործելու են այն ճնշումների և սահմանափակումների բանաձևերը, որոնք ստիպելու են նահանջել՝ հասնելով վերջին դարպասներին: «Կարծես թե այս հանրաքվեով ևս մենք հնարավորինս մոտեցրինք այդ դարպասները»,- նշեց Տիգրան Եգորյանը՝ հավելելով, որ հիմնական և առնցքային հարցը ստորագրված ցուցակների հրապարակումն է:
Տ. Եգորյանի կարծիքով՝ այն, որ տարբեր առաջարկներ են արվում, և ՀՀԿ-ն պատրաստվում է փոփոխություններ անել, դա շատ լավ է և կարևոր է: Նրա խոսքով՝ դա ժողովրդի հաղթանակն է, որ ՀՀԿ- ին պարտադրվել է այդ փոփոխությունները կատարել. «Բայց պետք է ուշիուշով հետևել գործընթացին, հետևել բարձրաձայնված վտանգներին:
Անհրաժեշտ է լինելու ընտրացուցակները հրապարակել, առանց այդ ցուցակների հրապարակման հնարավոր չի լինելու լիարժեքորեն ապահովել կամքի ազատ արտահայտման միջոցով քվեարկությունը»:
«Իրավունքի Եվրոպա» միավորման նախագահ Լուսինե Հակոբյանի խոսքով՝ եթե ընտրացուցակները էլետրոնային եղանակով գոյանան, շատ ավելի հեշտ կլինի վերբեռնել համացանց և այդպիսով՝ ստուգելի դարձնել դրանք հանրության համար:
Մանրամասները՝ տեսանյութում: