Ֆրանսիան և Մեծ Բրիատանիան հայտարարել են, որ Ռուսաստանը պարտավոր է ճնշում գործադրել Սիրիայի նախագահ Բաշար Ասադի վրա, հայտնում է RIA Novosti-ն:
ՄԱԿ-ի Անվտանգության խորհուրդը չորեքշաբթի հանդիպում է անցկացրել Սիրիայում հումանիտար իրավիճակի հարցով, կապված Հալեպում բախումների ակտիվացման և երկրի հյուսիսային շրջաններից փախստականների քանակի ավելացման հետ: Դիվանագետի խոսքերով` խորհրդակցությունները կարևոր նշանակություն ունեն փետրվարի 11-ին Մյունխենում Սիրիայի միջազգային աջակցման խմբի հանդիպումներից առաջ:
ՄԱԿ-ում Մեծ Բրիտանիայի մշտական ներկայացուցիչ Մեթյու Ռայկրոֆթի խոսքերով` նիստի գլխավոր թեմաները կլինեն Հալեպի շրջանում օդային ռմբակոծումների դադարեցումը և անհրաժեշտ հումանիտար օգնության հասանելիությունը:
Խոսելով Ռուսաստանի մասին, նա «մտահոգություն է հայտնել նրանց կողմից իրենց պարտավորությունների չկատարման վերաբերյալ»:
«Նրանք պարտավորություն ունեն իրենց ազդեցությունն օգտագործելու Ասադի ռեժիմի վրա, կրակի դադարեցման, պատշաճ հումանիտար հասանելիության և օդային ռմբակոծումների դադարեցման հասնելու համար, ինչը գլխավոր քարտուղարն արդարացիորեն քննադատել է` անվանելով ժնևյան բանակցությունների դադարեցման պատճառ»,- հայտարարել է Ռայկրոֆթը:
Իր հերթին, ՄԱԿ-ում Ֆրանսիայի մշտական ներկայացուցիչ Ֆրանսուա Դելատրը ընդգծել է, որ «Ֆրանսիան սպասում է, որ ռեժիմը և նրա դաշնակիցները կհարգեն հումանիտար պարտավորությունները և ՄԱԿ-ի ԱԽ 2254 բանաձևը»: Նա նշել է, որ անհրաժեշտ է «դադարեցնել համատարած ռմբակոծումները, վերացնել քաղաքների պաշարումը և ներկայացնել ամբողջական հումանիտար հասանելիություն»: «Մենք սիրիական ռեժիմից և նրա դաշնակիցներից բարեհաճություն չենք խնդրում, դա նրանց պարտավորությունն է»,- հայտարարել է դիվանագետը:
