ԱՄՆ ազգային հետախուզության տնօրեն Ջեյմս Քլեփերը գլոբալ սպառնալիքների վերաբերյալ ամերիկյան Սենատի ԶՈւ հարցերով հանձնաժողովի առաջ ներկայացրած ամենամյա զեկույցում հայտարարել է 2016 թվականին Լեռնային Ղարաբաղի հակամարտության սրման հավանականության մասին։
Զեկույցում նշվում է, որ ԼՂ խնդրի շուրջ Հայաստանի և Ադրբեջանի միջև լարվածությունը 2015 թվականին բարձր է մնացել։ «Բաքվի կողմից ռազմական ուժի կայուն մեծացումը տնտեսական վատթարացող պայմանների հետ մեկտեղ մեծացնում է 2016թ. հակամարտության էսկալացիայի հավանականությունը։
Ադրբեջանի կողմից ԼՂ-ի նկատմամբ հավակնությունից հրապարակավ հրաժարվելու, ինչպես նաև Հայաստանի կողմից իր վերահսկողության տակ գտնվող տարածքից հրաժարվելու ցանկության բացակայությունը կշարունակի բարդացնել խաղաղ գործընթացը»,- ասվում է զեկույցում։
Կովկասի ինստիտուտի փոխտնօրեն Սերգեյ Մինասյանը մեզ հետ զրույցում նշեց, որ զեկույցն ամենևին չի նշանակում, թե Մինսկի խմբի կամ ԱՄՆ-ի պաշտոնական դիրքորոշումը հակամարտության կարգավորման հարցում որևէ կերպ փոխվել է։
Մինասյանը նշում է՝ զեկույցում տեղ գտած գնահատականները հիմնականում օբյեկտիվ են և արտացոլում են իրականությունը։
Ազգային ժողովի պատգամավոր Թևան Պողոսյանն էլ իր հերթին նշում է՝ զեկույցում տեղ գտած գնահատկանները համընկնում են հայ փորձագետների և գնահատականների հետ։ Միևնույն ժամանակ նշում է, որ զեկույցի հեղինակները փորձում են նաև որոշակի ակնկալիքներ և սպասումներ ձևավորել։