Երեկ Երևանի քաղաքապետարանն ի գիտություն է ընդունել մարտի 1-ին Ազատության հրապարակում հանրահավաք կազմակերպելու «Հայ ազգային կոնգրես» կուսակցության և «Նոր Հայաստան» հանրային փրկության ճակատի առանձին դիմումները:
Երկու ուժերն այժմ բանակցություններ են վարում միասնական հանրահավաք անցկացնելու համար, թեպետ վերջնական որոշում և պայմանավորվածություն դեռ չկա։
ՀԱԿ փոխնախագահ Լևոն Զուրաբյանն ավելի վաղ մեզ հետ զրույցում նշել էր, որ Մարտի 1-ի բացահայտման հարցում ոչ մի քաղաքական ուժ այնքան հետևողական չի եղել, որքան Կոնգրեսը՝ ընդգծելով, որ իրենք 2009-ից ի վեր նույն օրակարգով հանրահավաք են անցկացնելու, և այս տարին էլ բացառություն չէ։
Անդրիաս Ղուկասյանը Զուրաբյանի հայտարարությունների հետ համակարծիք է։ Ղուկասյանը հավելում է, որ այս պահին չկա որևէ պատճառ, որից ելնելով՝ երկու ուժերը առանձին հանրահավաք անցկացնեն։ Նրա խոսքով՝ այդ ուղղությամբ բանակցությունները շարունակվում են, և շուտով դրանց վերջնական արդյունքը հայտնի կդառնա։
Հիշեցնենք, որ «Նոր Հայաստան» հանրային փրկության ճակատը չորս հիմնական պահանջ է առաջ քաշում՝ միջազգաին պատժամիջոցների ենթարկել Մարտի 1-ի կազմակերպիչներին, ազատ արձակել քաղբանտարկյալներին, կրճատել ոստիկանական զորքերի թիվը և հայտարարել համաներում՝ բանտերի գերծանրաբեռնվածության խնդիրը լուծելու համար։